17-mart kuni Florida, Illinoys va Arizona shtatlarida o’tgan Demokratik partiya ichki saylovida sobiq vitse-prezident Jo Bayden raqibi Berni Sanders ustidan ishonchli g’alaba qozondi. Koronavirus tufayli Ogayodagi saylov boshqa kunga qoldirilgan.
Har uch shtatda demokratlarning aksariyati Bayden nomzodini qo’llab-quvvatladi.
“Kampaniyamiz uchun juda yaxshi kecha bo’ldi. Demokratik partiyadan prezidentlik nomzodini qo’lga kiritishga yanada yaqinlashdik. Biz buni noyabrda g’alaba qozonish uchun keng koalitsiya tuzish orqali qilyapmiz”, - dedi Bayden.
Seshanba kungi g’alaba ortidan Baydenda nomzodlik uchun kerakli minimum delegatlar soni 50 foizdan oshdi.
Saylov natijalariga ko’ra, u afro-amerikaliklar, mo’tadil qarashdagilar va keksalar ishonchini qozongan. Sandersdan Bayden tomonga o’tganlar ham bor.
“Juda yaxshi ko’ringan ba’zi narsalar hozirga kelib amalga oshirish mushkul ekani ma’lum bo’ldi”, - deydi saylovchilardan biri.
Koronavirus saylovga tahdid solmoqda. Ogayoda shu munosabat bilan ovoz berish qoldirildi.
“Yaxshi niyat bilan bir odam ovoz berishga kelib, boshqalarga virus yuqtirishi mumkin”, - dedi shtat gubernatori Mayk Devayn.
So’rovlarning ko’rsatishicha, saylovchilar uchun sog’liq muhim masala.
“Pandemiyani hal qilish milliy xavfsizlik masalasi, xuddi urushga o’xshaydi. Bu yetakchilikni, hukumatning har bir darajasida hamkorlikni talab qiladi”, - dedi Jo Bayden.
Ba’zilar Bayden birinchi tanlovlari bo’lmaganini aytadi.
“Avval qilgan ishlari, diplomatligi menga ma’qul. Vitse-prezidentlik davrida ham prezidentlardek ishlagan”, - deydi arizonalik saylovchi.
Virus tarqalayotgani bois boshqa bir qator shtatlarda ham ovoz berish keyinga qoldirildi.
Facebook Forum