Inson huquqlari bilan shug’ullanuvchi “Xalqaro Amnistiya” tashkiloti AQShning Bryusseldagi elchixonasi yonida norozilik namoyishi o’tkazib, Prezident Jo Baydenni Guantanamodagi qamoqxonani yopishga chaqirdi.
Kubaning Guantanamo orolidagi qamoqxona AQShga qarashli bo’lib, unda terrorizmda gumon qilingan odamlar, ko’p hollarda rasmiy ayblovsiz saqlanadi.
"Qamoqxonani yopish vaqti keldi, chunki qiynoqqa solishlar, g’oyib bo’lishlar, inson huquqlarining qo’pol buzilishiga sababdir bu joy”, - deydi “Xalqaro Amnistiya”ning Belgiyadagi idorasi rahbari Vis de Grev.
Bayden NATO va Yevropa Ittifoqi rahbarlari bilan uchrashish uchun Bryusselga borgan.
Qamoqxona 2001-yil 11-sentabridagi voqealardan so’ng ochilgan. Inson huquqlari faollari mahbuslar qamoqxonada qattiq so’roq qilinganini, hatto qiynoqqa solinganini da’vo qiladi.
Sobiq prezident Barak Obama Guantanamoni yopmoqchi bo’lgan edi, biroq Donald Tramp Obama qarorini bekor qilgan. Obamaga o’rinbosar bo’lgan Bayden qamoqxonani yopish niyatida.
Guantanamoda jami salkam 800 odam saqlangan, hozir faqat 40 nafari qolgan, shulardan 9 tasi boshqa mamlakatga ko’chirilishi mumkin.
Facebook Forum