Amerika va Yevropa Ittifoqi Belarusga qo'yilgan ayrim sanksiyalarni vaqtincha bekor qildi. Minsk qamoqdagi siyosiy mahbuslarni qo'yib yuborgach, G'arb shu tariqa javob qilmoqda.
Davlat departamenti matbuot kotibi Jon Kirbining aytishicha, bu qaror Belarus iqtisodiyoti uchun kengroq imkoniyatlarni ochib beradi.
Biroq, deydi Kirbi, Amerika Belarusni inson huquqlari va demokratiya sohalarida ko'proq ishlar qilishga da'vat etadi.
Belarus Prezidenti Aleksandr Lukashenkoni Amerika bir paytlar "Yevropaning oxirgi diktatori" deya ta'riflagan edi. Lekin oxirgi damlarda rasmiy Minsk G'arb bilan aloqalarni yaxshilashga harakat qilayapti. Xususan, Belarus hukumati Rossiya qo'llab-quvvatlovini olgan isyonchilar va Ukraina o'rtasida vositachilik qildi.
Tahlilchilarning aytishicha, Yevropa va Amerika Rossiyaning tobora agressiv harakatlari fonida Belarusni yakkalash emas, balki sherik qilib olish siyosatini olg'a surmoqda. G'arb bu bilan mintaqada ittifoq orttirmoqchi. 21 yildan beri Belarusni boshqarayotgan Lukashenko ham Amerika va Yevropa Ittifoqi bilan orani yaxshilashga xayrixoh.
