AQSh Kongressining quyi palatasida chorshanba, 22-iyundan buyon ish to’xtab qolgan. Bir guruh demokrat qonunchilar mamlakatda qurol savdosini cheklashni talab qilmoqda. Ammo qonunchilik organida hukmron respublikachilar qonun loyihalarini ovozga qo’yishdan bosh tortmoqda.
Namoyishga Jorjiya shtatidan kongressmen, 1960-yillarda fuqarolik huquqlari uchun kurashgan Jon Luis boshchilik qilayapti. 12-iyun kuni Florida shtatidagi otishma jamoatchilikni junbushga keltirgan.
“Qurolli zo’ravonliklarni to’xtatish uchun nima chora ko’rdik? Qani jasorat?” - deya Jon Luis o’tgan yillar ichida ommaviy otishma ro’y bergan shaharlarni birma-bir sanab o’tdi.
Aksiyaga yakun yasash uchun respublikachilar 5-iyulgacha ta’til e’lon qildi. Vakillar Palatasidan jonli translyatsiya uzilgan.
Ammo isyonchi qonunchilar telefon orqali, "Facebook" singari ijtimoiy tarmoqlar orqali o’z talablarini olg’a surishda davom etmoqda. Respublikachilar aksiyani “siyosiy tomosha” deya tanqid qilayapti. Ularning aytishicha, qurolga egalik har bir fuqaroning konstitutsiya bilan kafolatlangan huquqidir.
Prezident Obama va demokratlar qonunlarni o’zgartirishga harakat qilsa-da, qurol-aslaha ishlab chiqaradigan kompaniyalar va Respublikachilar partiyasi o’zgarish istamaydi.
