AQShda “Jonson va Jonson” kompaniyasining koronavirusga qarshi vaksinasi bilan emlangan olti ayolda tromb hosil bo’lishi ketidan hukumat shtatlarga emlashni vaqtincha to’xtatishni tavsiya qildi. Ayollardan biri jon berdi, ikkinchisining ahvoli og’ir ekani aytilmoqda.
Bungacha ayrim mamlakatlarda “AstraZeneka” kompaniyasining vaksinasi bilan emlash ham aynan shu sababga ko’ra to’xtatilgan edi.
Trombozning kamdan-kam uchraydigan turi “Jonson va Jonson” vaksinasi bilan AQShda emlangan salkam 7 million odamning olti nafarida qayd etildi. Bu vaksinaning xavf darajasi har bir million odamga bir holat degani.
“Jonson va Jonson” vaksinasi mamlakatda emlangan 190 milliondan ziyod odamning 5 foizidan kamiga to’g’ri keladi, xolos”, - dedi Oq uy rasmiysi Jeff Ziyents.
Bayden ma’muriyatiga ko’ra, 300 million aholi uchun yetarlicha miqdorda “Pfayzer” va “Moderna” vaksinalari g’amlangan, kuniga 3 milliondan ziyod odam emlanmoqda.
“Jonson va Jonson” vaksinasining yon ta’siri emlanishga shubha bilan qarayotgan odamlarni vahimaga solishi aytilmoqda. Bundaylar Amerikada 20 foizni tashkil etadi.
“Jonson va Jonson” vaksinasining muhim bir xususiyati shundan iboratki, uni boshqa vaksinalarga qaraganda o’ta past haroratda saqlash shart emas va emlanish faqat bir dozadan iborat.
“Bu vaksina uysiz odamlar uchun qulay, chunki ikkinchi dozani beraman deb ularni qidirib qolmaysiz. Mobil klinikalar uchun qulay bu vaksina, ikkinchi marta qaytib kelish shart emas”, - deydi Jons Xopkins universitetining Bioetika instituti rahbari Jeffri Kan.
Ayrim mamlakatlarda emlangan odamlarda tromb hosil bo’lishi natijasida “AstraZeneka” vaksinasi bilan ham emlash to’xtatilgan.
“Jonson va Jonson” hamda “AstraZeneka” vaksinalari “Moderna” va “Pfayzer” vaksinalaridan o’zgacha yo’l bilan tayyorlanadi. Agar tromb vaksinani deb hosil bo’layotgan bo’lsa, nima bunga sabab bo’lyapti degan savol tug’iladi. Ayni damda shu holat tekshirilmoqda”, - deydi Vanderbilt universiteti professori Uilyam Shaffner.
Ayniqsa Yevropa mamlakatlari vaksinalarning yon ta’siridan xavotirda. Natijada qit’ada emlash kampaniyasi sust kechmoqda. Yevropa tibbiyot boshqarmasi ijrochi direktori Emer Kukning aytishicha, koronavirusdan o’lish xavfi vaksina yon ta’siridan o’lish xavfidan ancha yuqoridir.
"Vaksinalar bizga COVID ga qarshi kurashda yordam berishi muhimligiga urg’u berishimiz va bu vaksinalardan foydalanishda davom etishimiz kerak”, - deydi u.
“Jonson va Jonson” kompaniyasi vaksina va tromboz o’rtasida bevosita aloqa yo’qligini da’vo qilmoqda.
Facebook Forum