AQSh Davlat kotibi Jon Kerri Hindistonni jahon sahnasida AQSh bilan hamkorlikda faolroq rol o'ynashga undadi.
Hind Texnologiya instituti talabalari huzurida so'zlagan Kerri Hindistonni "butun sayyoraga ta'sir qiladigan masalalar bilan ishlaydigan qudrat" deb atadi.
Terrorizmdan tortib iqlim o'zgarishigacha bo'lgan global muammolarni yechishda dunyoning ikki eng katta demokratiyasi o'zaro hamkorlik qilishi juda muhim, deya qayd etdi AQSh diplomati.
"Hindiston va AQSh o'rtasidagi chuqur hamkorlik ham ikki davlatga, ham butun dunyoga foydali", - dedi u.
Yetakchi davlatlar, deya qo'shimcha qildi Kerri, chegaralardan tashqaridagi tahdidlarga befarq qaray olmaydi, chunki bugungi globallashgan dunyoda bu tahdidlar bir kun kelib chegaralardan oshib o'tadi.
Dehlida o'tgan uchrashuvda AQSh Davlat kotibi terrorizmga qarshi kurash, Pekinning Janubiy Xitoy dengizida oshib borayotgan harbiy tahdidini jilovlash mavzulariga alohida e'tibor qaratdi.
AQSh va Hindiston birga e'lon qilgan qo'shma bayonotda Janubiy Xitoy dengizida erkin harakatlanish huquqining ahamiyatiga urg'u berildi.
Shuningdek, Kerri Hindistonning Tinch okeanida xavfsizlik kafolati bo'ladigan kuchga aylanishini AQSh qo'llab-quvvatlashini bildirdi.
Hindiston uchun yana bir xavotirli masala bu qo'shni Pokistonning terrorchilar to'planadigan hududga aylanib borayotganidir.
"Ijobiy o'zgarishlar bo'lyapti va pokistonliklar bu borada ko'proq ishlashyapti", - dedi Kerri.
Davlat kotibi ayni paytda Pokiston ham terrorizmdan ko'p aziyat chekkanini eslatib o'tdi. Ekstremistlar hujumlarida shu paytgacha 50 ming pokistonlik halok bo'lgani aytiladi.
