AQSh Davlat kotibi Jon Kerri bugun Iordaniyada bo'lib, Suriya va Iroqda "Islomiy davlat"ga qarshi kurash, Quddusda yahudiylar va falastinliklar o'rtasida ziddiyatlar xususida gaplashadi.
Kerri 2013-yilda davlat kotibi bo'lganidan beri Yaqin Sharqqa o'ndan ko'p marta bordi. Iordaniyada Qirol Abdulla bilan ko'rishishi kutilmoqda.
Kerrining mintaqadagi asosiy vazifalaridan biri Isroil-Falastin tinchlik jarayoniga turtki berish. Aynan Kerrining harakatlari tufayli uch yilga to'xtab qolgan muzokaralar bir yil oldin jonlantirilgan edi. Biroq iyul va avgust oylarida Isroil va HAMAS 50 kun olishib, jarayon yana muzlab qoldi, Quddusda esa yahudiylar va musulmonlar diniy ziyoratgohlarni talasha boshladi.
Iordaniyadan so'ng AQSh davlat kotibi Birlashgan Arab Amirliklariga o'tib, tinchlk va xavfsizlik forumida qatnashadi, muzokaralar o'tkazadi.
