Qirg'iziston parlamenti bahorgi sessiyasini yakunlar ekan, prezident saylovi kunini belgilagan - 2011-yilning 30-oktabri.
Da'vogarlar ko'p. Asosan deputatlar, siyosiy partiyalarning rahbarlari va viloyatlarda ko'zga ko'ringan arboblar. Konstitutsiyaga binoan poyga saylov kunidan ikki oy oldin boshlanadi.
Yaqinda Vashingtonga safar qilgan deputatlar, sotsial demokrat Doniyor Terbishaliyev va muxolifatdan Doston Bekeshevning aytishicha, 10 ga yaqin emas, balki o'nlab siyosatchi maydonga chiqishi kutilmoqda.
Qonunchilar orasida kelishmovchiliklar hukm surar ekan, saylovning qachon o'tishi mavhum qolayotgan edi.
Siyosiy doiralarda ayrimlar amaldagi prezident Roza Otunbayevani vazifada uzoqroq qolish uchun harakat qilishga chaqirayotgan edi.
Otunbayeva bunga qarshilik bildirib, parlamentdan saylov yuzasidan tezroq qaror qilishni so'ragan. Qonunga muvofiq, Otunbayeva prezidentlikka o'z nomzodini qo'ya olmaydi.
Parlament boshqaruvida prezident vakolatlari pastroq bo’ladi, lekin hokimiyat uchun kurash tabiiy kurash emasmi, deya hayron bo’ladi “Respublika” partiyasi vakili Almazbek Botirbekov. Qirg’izistonda siyosatchiman degan odam rahbarlikka saylanishni istaydi, deydi u.
