AQSh Fazo agentligiga qarashli marsoxod 7 oyda salkam yarim milliard kilometr yo’l bosib, Mars sayyorasiga qo’nishga muvaffaq bo’ldi. Apparat Qizil sayyorada hayot izlarini qidirish bilan shug’ullanadi.
“Mars atmosferasiga kirish oson va xavfsiz emas edi, chunki atmosfera o’ta yupqadir – Yer atmosferasining 1 foiziga teng. Bunday sharoitda apparat tezligi katta bo’lib, tezlikni sekinlashtirish uchun atmosfera yetarlicha qalin emas. Apparatni qo’ndirish oson bo’lmadi”, - deydi NASA olimi Lori Greyz.
NASA marsoxodni Ezero krateriga qo’ndirishga harakat qildi. Olimlar nazarida, kraterda bir vaqtlar hayot uchun zarur suv bo’lgan.
“Persevirens” NASAning eng yirik marsoxodi bo’lib, Qizil sayyorani kichik hamjdagi vertolyoti bilan kezadi, jismlar to’playdi, olimlar esa ushbu jismlar asosida “Marsda hayot bo’lganmi?” degan savolga javob berishga harakat qiladi.
“Apparat to’plab qo’ygan namunalarni 2030-yilgacha Yerga olib kelamiz. Shunda Yerdan Marsga ilk bor borib kelgan bo’lamiz”, - deydi NASA Ilmiy missiyasi boshqarmasidan Tomas Zurbuken.
“Persevirens” Marsda ikki yil izlanish olib boradi, krater o’rnida bir paytlar ko’l bo’lgan joyni obdon tekshiradi.
Facebook Forum