AQShda prezidentlik poygasi qizg’in davom etmoqda. Kecha “Super Seshanba” nomi ostida besh shtatda o’tgan saylovlarda respublikachi Donald Tramp va demokrat Hillari Klinton g’alaba qildi. Tramp barcha shtatlarda g'alaba qozongan bo'lsa, Klinton to'rt shtatda ko'pchilik ovozlarni qo'lga kiritdi.
Davlatmand tadbirkor Respublikachilar partiyasidan prezidentlikka nomzod bo’lishi ehtimoli yanada oshdi. Tramp besh shtatning har birida raqiblaridan yirik farq bilan ustun keldi.
“Meni Oq uyga saylasangiz, davlatimiz buyuklik mash’alasini qayta qo’lga oladi”, - dedi biznesmen.
Uning fikricha, saylovning saralash bosqichi tugadi hisob. Tramp ikki raqibini poygani tark etishga undamoqda.
Sobiq tashqi ishlar vaziri Hillari Klinton Pensilvaniya, Merilend, Konnektikut va Delaver shtatlarida g’alabaga erishdi.
Nomzod bo’lish uchun zarur delegatlarning 90 foizini qo’lga kiritgan Klinton saralash poygasini tezroq yakunlab, e’tiborni noyabrdagi umumiy saylovga qaratmoqchi.
Raqibi Berni Sanders esa Tramp bilan bellashish uchun men kuchliroq nomzodman, deyishda davom etmoqda. U hali-veri poygani tark etmoqchi emasligini bildirgan.
