NATO sammitida qatnashish uchun Londonga borgan AQSh Prezidenti Donald Tramp Fransiya rahbari Emmanuel Makronning “alyans miyasi ishdan chiqdi” mazmunidagi gaplarini tanqid qilib, “jirkanch bayonot” deb atadi.
Trampning aytishicha, shuncha ichki muammolar turganda Makron NATOni tanqid qilishga haqqi yo’q edi.
“Fransiyada shunday muammolar turganda Makrondan bu kabi qattiq bayonot eshityapmiz. “Sariq nimchalar” harakatiga e’tibor bering. Umuman, bu yil Makron uchun oson bo’lmadi. NATOni behurmat qilish mavridi emas”, - dedi Tramp.
Makron o’tgan oy Britaniyaning “Ekonomist” (The Economist) jurnaliga bergan intervyusida aytgan bu gaplarini himoya qilib, NATO qaysi a’zo mudofaaga qancha sarflayotgani bilan qiziqmay, kun tartibidagi muammolar bilan shug’ullanishi kerak, dedi.
Tramp sammit doirasida Makron bilan yuzma-yuz uchrashdi.
AQSh rahbari Qo’shma Shtatlar NATO byudjetining katta qismini qoplashga majbur ekanidan nolib, 2017-yildan beri NATOga a’zo davlatlarni mudofaaga ko’proq pul sarflashga chaqirib keladi.
Alyans bosh kotibi Yens Stoltenbergning aytishicha, Tramp yetakchiligi tufayli byudjet masalasida jiddiy o’zgarishlar bor.
NATO sammitida, shuningdek, aksilterror harakatlar, qurol nazorati, Rossiya bilan munosabatlar va Xitoy harbiy qudrati ham muhokama etilmoqda.
Facebook Forum