Hindistonda yangi qonunga e’tiroz bildirib namoyish qilayotgan minglab fermerlar mamlakat bo’ylab ish tashlashga chaqirmoqda. Ular nazarida, Bosh vazir Narendra Modining qishloq xo’jaligini zamonaviylashtirishga qaratilgan islohoti natijasida agromahsulot narxlari va fermerlar daromadi tushib ketadi.
Your browser doesn’t support HTML5
Xalqaro hayot – 14-dekabr, 2020-yil
Hindistonning turli burchaklaridan to’plangan dehqonlar poytaxt Dehli atrofidagi beshta trassa bo’ylab chodirlar qurgan, hukumat ushbu qonunlardan voz kechmasa, uylariga qaytmasligini bildirmoqda.
Dehliga yetaklovchi trassalar uch haftadan beri to’silgan, hukumat vakillari bilan kechayotgan muzokaralar natija bermayapti, fermerlar qonunlarning munozarali bandlarini o’zgartirish taklifiga ko’nmayapti, qonunlarni butunlay bekor qilishga chaqiryapti.
Fermerlar ochlik ham e’lon qilishini aytmoqda.
Hukumat qishloq xo’jaligida erkin savdoni joriy etmoqchi. Shu kungacha mahsulotlarini davlat bozorlarida davlat belgilagan narxda sotayotgan dehqonlar nazoratning bekor qilinishi ko’plarining xonavayron bo’lishiga yetaklashini aytmoqda. Ular hukumatga bosimni kuchaytirish maqsadida poyezd qatnovini ham izdan chiqarmoqchi.
Hindiston Fermerlar ittifoqi o’tgan juma Oliy Sudga yangi qonunlar bo’yicha shikoyat qildi.
Mamlakat aholisining salkam 60 foizi qishloq xo’jaligida band. Modining aytishicha, islohotlar qishloq xo’jaligiga xususiy sarmoyalarni jalb etib, hosildorlikni oshirishga yordam beradi.