Londonda har yili o’tadigan ommaviy marafon COVID-19 sabab bekor qilindi. London marafonlarida odatda 40 mingga yaqin odam qatnashadi, turli xayriya maqsadlari uchun millionlab funt sterling to’planadi.
Marafon aprel oyida o’tishi kerak edi, biroq avgustgacha qoldirildi. Tashkilotchilar marafon ishtirokchilari va tomoshabinlar salomatligini o’ylab tadbirni bekor qilishga qaror qildi. Ammo oktabr oyida ikki nafar marafon yulduzlari ishtirokida Londondagi markaziy bog’ va uning atrofida bir necha yo’lakda musobaqa o’tkazish rejada.
O’tgan yilgi g’olib keniyalik Eliud Kipchoge London marafonida beshinchi oltin medalni qo’lga kiritishga umid qilmoqda. Kipchoge o’tgan yili Venada o’tkazilgan norasmiy poygada g’alaba qozonib, marraga ikki soatdan kam vaqt ichida yetib kelgan ilk marafonchi bo’ldi.
35 yashar Kipchoge 12 ta marafondan 11 tasida, jumladan 2016-yil Rio-de-Janeyro Olimpiya o’yinlarida g’olib bo’lgan.
London marafonida u efiopiyalik Kenenisa Bekele bilan bellashadi. Bekele 10 ming va 5 ming metrga yugurishda uch karra Olimpiya va besh karra jahon chempioni. O’tgan yili u Berlin marafonida g’alaba qozonib, marraga Kipchogening jahon rekordidan ikki soniya kech keldi.
London marafoni bilan bir qatorda bu yili Boston, Berlin, Nyu-York va Chikago shaharlaridagi an’anaviy marafonlar ham o’tkazilmaydigan bo’ldi.