O’tgan yil mart oyida Yangi Zelandiyaning Kraystcherch shahrida ikki masjidga qurol bilan bostirib kirib, 51 musulmonni o’ldirgan Brenton Tarrant ismli avstraliyalik Yangi Zelandiya tarixida avf etilish imkonisiz umrbod qamoqqa mahkum etilgan ilk odam bo’ldi.
Your browser doesn’t support HTML5
Xalqaro hayot – 27-avgust, 2020-yil
Yangi Zelandiya adliyasi tarixida bunday qattiq jazo bo’lmagan hali. Tarrant sodir etgan jinoyat ham mamlakat tarixida ilk bor qayd etildi.
29-yashar qotilning harakatlari natijasida 49 odam jarohat olgan. Tarrant qilmishlarini videoga olib, Facebook orqali bevosita uzatgan edi.
Tarrant mart oyida unga qo’yilgan barcha ayblovlarga iqror bo’lgan. Prokurorlarning aytishicha, qotil hujumlarga puxta tayyorgarlik ko’rgan.
Tarrant qilgan ishidan pushaymon emasligini aytib, ko’proq odamlarni o’ldira olmaganidan va rejaga ko’ra masjidlarni yoqa olmaganidan afsusdaligini bildirgan.
Hukmni o’qib eshittirgan sudya Kameron Manderning aytishicha, Tarrant yaradorlarning yolvorishiga qaramay ularga qayta o’q uzgan.
“Sen ibodat qilishga kelgan odamlarni nishonga olding. Odamlarning tinchlik va do’stlik uchun to’planadigan joyini harom qilding. Sen oddiy qotil emassan, sen terrorchisan”, - dedi hakam.
Ultramillatchi qarashlarga ega hamda oq tanlilar ustunligi g’oyasi tarafdori bo’lgan ayblanuvchi advokatlari orqali hukmga e’tiroz bildirmasligini aytdi.
Sudya Manderning aytishicha, Tarrant umrbod qamoq jazosidan ham kattaroq jazoga loyiqdir.