Turkiya-Suriya chegarasida NATO mudofaa tizimi shay holatda

Yil boshida Turkiya janubi-sharqida AQShda ishlangan va NATO tomonidan quvvatlangan olti mudofaa sistemasi joylashtirildi. Maqsad - Suriyadan kelayotgan xavfni bartaraf etish.

Turkiya-Suriya chegarasidagi NATO mudofaa tizimi/Navbahor Imamova

“Patriot” deb nomlangan tizimlarni amerikalik askarlar boshqaradi. Ular Turkiyaning Gaziantep shahri yaqinidagi harbiy bazadan o’rin olgan.

Gaziantep Suriya chegarasidan 50 kilometr… Qo’shni davlatda fuqaro urushi avjida. O’tgan ikki yildan beri 70 mingga yaqin odam halok bo’ldi.

Suriya qurolli kuchlari uchun asosiy dushman isyonchilardir. Ularni esa Turkiya quvvatlab turibdi. Suriya snaryadlari bir necha bor Turkiyaga tushib, shu kungacha besh kishi o’ldi.

G’azabga kelgan Anqara, NATO a’zosi, bu harbiy ittifoqdan yordam so’radi va uning hududida mudofaa tizimlari o’rnatildi.

Alyansning Gaziantepdagi qo’mondoni Charlz Brenson deydiki, radar sistemasi ehtimoliy tahdidni darhol aniqlab, NATOga axborot uzatadi. Bir necha sekund ichida javob beriladi.

“Bu tizim xavfni filtrdan, elakdan o’tkazadi. Qanchalik jiddiy ekanini ko’rib chiqib, chora ko’ramiz. Javob qaytarishga munosibmi yoki yo’q. Buni aniqlash murakkab, tezlikda amalga oshiriladigan jarayon”,- deya tushuntiradi leytenant-polkovnik Brenson.

AQShdan borgan ikki raketa batareyasi, ya’ni tizimi ustida 575 askar xizmat qiladi. Har bir batareyada 48 raketa va ularni otadigan olti moslama bor.

Germaniya va Gollandiya ham har biri ikkitadan raketa batareyasi yuborgan. NATOning qayd etishicha, bu tizimlar hujumkor emas, aynan mudofaa uchun. Shu kungacha biror raketa otilmagan.

Kapitan Lesli Dembek deydiki, guruh har narsaga tayyor, ogoh turibdi.

“Mashq qilamiz. Xavf tug’ilsa, munosib javob qaytarish uchun shay turishimiz kerak”.

Amerikalik leytenant Meri Joselin missiyani bajarish muqaddas burch deydi.

“Turkiyaga yordam berish uchun keldik bu yerga. Xizmatdamiz. Zarur tayyorgarlikdan o’tgan maxsus bo’linma bu. Nima qilayotganimizni juda yaxshi bilamiz”,- deydi leytenant.

Xizmatdagilarning birortasi, hatto qo’mondon ham missiya qancha davom etishini bilmaydi. Suriyada vaziyat kun sayin murakkablashib bormoqda. Ayrim shaharlar butunlay bo’shab qolgan. Qonli janglar ularni qora, tutun bosgan, vayrona maydonlarga aylantirgan.

Mana shu dahshatdan atigi bir necha kilometr narida o’rnatilgan G’arb mudofaa tizimi katta kuchdek tuyuladi. Xatoga o’rin va toqat yo’q, deydi qo’mondon Charlz Brenson. AQSh yoki Yevropa Ittifoqidan kelgan kuchlar ruxsatsiz biror qadam tashlamaydi.