Qo’shma Shtatlarda mahalliy energiya ishlab chiqarish oshgan sari import miqdori kamayib bormoqda. Mamlakat hozirda energiyasining taxminan 20 foizini xorijdan sotib oladi. Siyosatchilar energetik mustaqillikka erishishimiz kerak, deb yillardan buyon bong urib keladi. Hozircha bunga erishilgani yo’q.
Shamol tegirmonlari, quyosh panellari, tabiiy gaz konlari - AQSh energetika sanoati katta potensialga ega.
Ammo tozaroq manbalar mavjudligiga qaramasdan, qazilma yoqilg’iga tobelik hamon kuchli. 2017-yilda energiya iste’molining qariyb 80 foizini neft, tabiiy gaz va ko’mir tashkil etgan. Energiyani tejash, undan samarali foydalanish turli doiralarda doimiy muhokama qilinadi.
“Shamol, quyosh, suv va boshqa yo’llar bilan olinadigan energiyani saqlash va keragida ishlatish ustida tadqiqotlar ketmoqda. Mana shu texnologiyalar takomillashtirilsa, biznes qilish usullari tamoman o’zgaradi”, - deydi AQSh Energetika vaziri Rik Perri.
Sobiq energetika vaziri Ernest Moniz yuqoridagi fikrga qo’shiladi. Uning aytishicha, suyultirilgan gaz ham AQShning energetik kelajagida muhim rol o’ynaydi.
“Batareyalar yaxshilanadi, energiyani saqlash muddati uzayadi. Ammo uzoq muddatga saqlash haqida gap ketganda, qayta tiklanuvchi manbalar qatorida tabiiy gazdan ham foydalanishimiz kerak. O’tgan yillar ichida AQSh suyultirilgan gaz eksportini ancha oshirishga harakat qilyapti. Avstraliya va Qatar bu sohada yetakchi”, - deydi Moniz.
AQShning energetika siyosati ham mamlakatning o’zida, ham xorijda xavfsizlik bilan bog’liq qarorlarga ta’sir ko’rsatadi.
“Gap zarur mahsulotni qo’lga kirita olishda. Ta’minotni oshirsak, dunyo bo’ylab do’stlarimiz va ittifoqchilarimiz uchun imkoniyatlar kengayadi. Dunyoda 1,4 milliard odam arzon energiya manbalaridan uzilgan. Tabiiy gaz, yadro va boshqa manbalarni rivojlantirish turmush darajasini ko’taradi, odamlarni qashshoqlikdan chiqaradi”, - deydi energetika bo'yicha mutaxassis Nik Loris.
Ekspertlarga ko’ra, AQSh va dunyo davlatlari oldida turgan vazifa - tez sur’atlarda o’sib borayotgan energiya ehtiyojlarini qondirish uchun global g’oyalar va yechimlar bilan chiqishdir.