AQSh Prezidenti Donald Tramp seshanba kuni Oq uyda Malayziya Bosh vaziri Najib Razoqni qabul qilib, bu mamlakatning AQShga qilayotgan sarmoyalari va terrorga qarshi kurashini ijobiy baholadi.
Ikki mamlakat “Boing” yo’lovchi samolyotlari va “Jeneral Elektrik”ning samolyotlar uchun dvigatellarini sotib olish haqida 20 milliard dollarlik bitim imzolash arafasida turibdi.
Najibning aytishicha, Malayziya AQShda infratuzilma va taraqqiyot loyihalari uchun 3-4 milliard dollar ajratadi. Tramp Malayziya hukumatining BMT sanksiyasi ostidagi Shimoliy Koreya bilan ish qilmayotganini olqishladi.
Najib Razoq Malayziyaning “Islomiy davlat” va al-Qoida kabi terror guruhlariga qarshi kurashi haqida ham so’zladi:
“Harbiy amaliyotlardan tashqari odamlarning ongini, qalbini zabt etishimiz kerak, mo’tadil musulmon hukumatlarni qo’llab-quvvatlashimiz kerak. Progressiv va zamonaviy davlatlar bilan yaqin aloqada bo’lsak, musulmon dunyosi muhabbatini qozona olamiz shunda”.