Amerikada 4-noyabrda Kongressga saylovlar. Vakillar Palatasi a’zolari har ikki yilda saylanadi, senatorlar esa olti yilda. Hozirda ko’plab shtatlarda partiyaviy saylovlar, ya’ni saralash jarayoni avjida. 2010-yilda Vakillar Palatasini demokratlardan tortib olib, u yerda respublikachilarni ko’pchilikka aylantirgan kuch “Choychilar” harakati edi. Nomiga qarab ularni choy bilan bog’liq bo’lsa kerak deb o’ylashingiz mumkin. Aslida ularning dardi hukumat. “Choychilar” o’taketgan konservatorlar bo’lib, Respublikachilar partiyasining eng radikal qanoti hisoblanadi. Ular nazarida bugun Amerikada boshqaruv konstitutsion cheklovlardan chiqib ketgan va fuqarolar ustidan nazorat har qachongidan kuchli. Ular davlatning inson hayotidagi rolini kamaytirish payida. Shuningdek, Amerika xalqaro maydonda ko’p sarf-xarajat qilmoqda deb hisoblashadi. “Choychilar” asosan dindor nasroniylardan iborat.  Yaqinlashayotgan saylovda ular e’tiborni mahalliy ijtimoiy-iqtisodiy masalalarga qaratmoqda. Navbahor Imamova hikoya qiladi.