AQSh hukumati yana ishdan to'xtaydimi?

Prezident Donald Tramp va demokrat liderlar 11-dekabr kuni AQSh-Meksika chegarasida devor qurilishi hamda byudjet masalasida tortishdi. Demokratlar chegara devorining qurilishiga davlat byudjetidan yirik hajmda mablag’ ajratilishiga qarshi. AQSh byudjeti Kongressda 21-dekabr kuni ovozga qo’yiladi. Respublikachilar nazoratidagi Kongress bayram arafasida hukumat byudjetsiz ma’lum muddatga yopilishining oldini olishga urinmoqda.

Prezident Tramp noan’anaviy bayonot berdi:

“Chegara xavfsizligi uchun hukumatni yopish men uchun faxr”.

Markaziy amerikalik migrantlar oqimini to’xtatishning mukammal yechimi Meksika bilan chegaraga devor qurish deb hisoblaydi prezident. Demokratlar lideri Nensi Pelosi aksincha fikrlaydi.

“Biz masalaga asosli yondashib, qaysi yo’l to’g’ri, unga qancha xarajat ketadi, qaysi qaror samarali ekanini o’ylashimiz kerak” - deydi u.

Byudjetni tasdiqlashga bir necha kun qolganda bo’layotgan bahs ikki partiya o’rtasida hanuz murosa yo’qligini anglatadi.

“Ikki yo’l taklif qildik. Ikkisi ham Vakillar palatasida ko’pchilik ovozini, Senatda 60 ovozni oladi. Hukumat ham yopilmaydi. Prezident buni qabul qiladi, deb o’ylayman”, - deydi demokrat senator Chak Shumer.

Demokratlar chegara xavfsizligi uchun 1,3 milliard dollar ajratishni taklif qilgan. Prezident devor qurilishi bilan birga umumiy 5 milliard dollar talab qilmoqda.

“Vakillar palatasida ko’pchilikni tashkil etish arafasida turgan demokratlarning chegara xavfsizligiga qarshi chiqishi mantiqsiz. Oldinda Senatda 60 ovoz olish talabi turibdi”, - deydi spiker Pol Rayn.

Senat respublikachilar nazoratida bo’lsa-da, byudjet tasdiqlanishi uchun demokratlarning ovozi ham kerak bo’ladi.

Bayram arafasida poytaxtni tark etishga urinayotgan qonunchilar vaziyatning siyosiy oqibatlarini ham o’ylamoqda.

“Prezident hukumatni yopishdan faxrlanmasligi kerak”, - deydi Shumer.

“Hukumat yopilishini xalq istamaydi”, - deydi respublikachi Mitch Makkonel.

Agar hukumat yopilsa, asosiy xizmatlarni kechiktiradigan va millionlab odamlarga ta'sir qiladigan bu voqea 2018-yilda 3-marta yuz bergan bo'ladi.