O'zbekistonda qiynoqlarga qarshi kurash qanchalik jiddiy?

Andijonda o’lim bilan tugagan qiynoq holati O'zbekiston huquq-tartibot tizimida islohotlar qanchalik haqiqiy degan savolni yana ham dolzarblashtirdi.

Bu savol hukumat tanqidchisi sifatida tanilgan xorijdagi ekspertlar yoki faollar emas, ichkarida, respublika rasmiy doiralarida va qonunchilar orasida ko’tarilmoqda.

11-may kuni Andijonda yosh fuqaro A. Abdukarimov mahalliy kasalxonada jon bergan. 29-may kuni uyidan militsionerlar tomonidan olib ketilgan yigit, Ichki ishlar vazirligi bergan ma'lumotlarga ko'ra, noqonuniy ushlab turilgan va kaltaklangan. Bu jinoyatni qilganlikda gumon qilinayotgan uch xodim ishdan olingan va hibsda. Andijon shahar Ichki ishlar boshqarmasining ikki rahbari ham bo'shatilgan va jami 19 xodim ma'muriy jazolangan. Tergov ishi davom etmoqda, deydi rasmiylar.

Deputat Qodir Jo’rayev Ichki ishlar rahbariyati qiynoqlar tufayli o’lgan marhumning yaqinlaridan uzr so’ramaganini tanqid qilsa, Oliy Majlisning yana bir a'zosi Rasul Kursherboyev jamoatchilikka ochiqlanmay qolayotgan qiynoq holatlariga e'tibor qaratib, islohotlarga yon bermayotgan tizim rahbari, Ichki ishlar vaziri Po’lat Bobojonovning iste’foga chiqish vaqti keldi, deya ta’kidlamoqda.

Hukumat qiynoqlarni yo’qotish uchun nima qilishi kerak? Qiynoqlarga qarshi kurash uchun Shavkat Mirziyoyev boshliq sistemada siyosiy iroda yetarlimi? "Amerika Ovozi" siyosiy tahlilchi Kamoliddin Rabbimov bilan suhbatlashdi.