Afg'onistonda Tolibonga qarshi namoyishlar bo'lib o'tdi

Afg’onistonda Tolibonga qarshi norozilik namoyishlari bo’lib o’tdi.

Kobul ko’chalarida odamlar norozilik ifodasi sifatida “Allohu akbar” deb qichqirgan.

“Biz Tolibonni xohlamaymiz. Hukumat ruxsat bersa ham, biz ularni qabul qilmaymiz”, - deydi Abdulloh Samadi ismli kobullik.

Namoyishlar dushanba oqshomida Tolibon kuchlari tomonidan qurshab olingan Hirot shahrida boshlandi. Odamlar uylarining tomiga chiqib, “Allohu akbar” deya Tolibonga qarshiligini ifodalagan.

Shundan so’ng mamlakatning boshqa shaharlarida ham isyonchilarga qarshi namoyishlar boshlandi.

“Askarlarimizning kayfiyatini ko’tarish uchun shu yerdamiz. Xavotir olishmasin, biz ularning ortidamiz”, - deydi kunarlik bir fuqaro.

Tolibon “Twitter” orqali “Allohu akbar” kalimasi guruhning shiori ekanini da’vo qildi. Afg’on rasmiylari esa xalq bu ifodani Tolibon bosqiniga qarshi ishlatayotganini aytdi.

“Tarixan Afg’oniston xalqi bosqinga uchragan payt takbir aytgan. Ularga ko’ra, aholi hozir ham bosqin bilan yuzlashmoqda”, - dedi Afg’oniston prezidenti idorasi so’zlovchisi Vohid Umar.

Kuzatuvchilarga ko’ra, bu namoyishlar xalqning urushdan charchaganini ko’rsatadi.

“So’nggi ikki kunda xalqning o’z ovozini balandlatgani ularning urushdan tinkasi quriganidan dalolat”, - deydi huquq faoli Aziz Rafaiy.

Tolibon mojaroga harbiy yechim yo’qligini aytib kelsa-da, amalda so’nggi oylarda hujumlar sonini keskin oshirgan. AQSh va xalqaro kuchlar mamlakatni tark etar ekan, isyonchilar ko’plab hududlar ustidan nazorat o’rnatmoqda.