Dunyo aholisi tez o’smoqda. Natijada oziq-ovqat, xususan, go’sht mahsulotlariga talab oshmoqda. Tadqiqotlarga ko’ra, laboratoriyada yetishtirilgan oziq-ovqat kelajakda go’sht o’rnini bosishi mumkin.
Siz ko’rib turgan bu mahsulot dengizda ovlangan yoki baliq fermasidan keltirilgan losos balig’i bilan bir xil.
Yagona farqi u tabiiy baliq emas, balki shimoliy Kaliforniyadagi laboratoriyada, losos hujayrasi asosida o’stirilgan.
“Biz losos hujayralasini o’simlikka asoslangan modda bilan aralashtiramiz. Shu asosda baliq to’qimalari paydo bo’ladi”, - deydi “Wildtype” kompaniyasi asoschisi Jastin Kolbek.
Go’shtga talab oshar ekan, kompaniyalar taklifni ko’paytirishning noan’anaviy yo’llarini sinab ko’rmoqda.
“Odamlarga yovvoyi tabiatga zarar bermaydigan yoki baliqchilik fermalariga bog’liq bo’lmagan tanlov imkoniyatini bermoqchimiz”, - deydi Kolbek.
“Upside Foods” kompaniyasi esa tovuq hujayrasi asosida yaratilgan jo’ja go’shtini sinovdan o’tkazmoqda. Ta’mi va ko’rinishi tovuqnikidan also qolishmaydi.
“Bu haqiqiy go’sht; parranda hujayrasidan o’stirilgan, xolos. Tovuqni boqib, so’ng so’yishga hojat yo’q”, - deydi kompaniya vakili Eymi Chen.
Kaliforniya universitetida “Muqobil go’shtlar” laboratoriyasini boshqarayotgan Rikardo San Martinning aytishicha, sun’iy go’sht mahsulotlari hali-veri bozorni egallamaydi.
“Hujayradan go’sht hosil qilish hozircha o’zini oqlamaydi. Buning samarali yo’lini topishimiz kerak. Uni sotib olishga hammaning qurbi yetadimi yoki u faqat boylar uchunmi?”, - deya so’raydi San Martin.
Jastin Kolbek ham bu fikrga qo’shiladi.
“Avvalo, bu texnologiya nimaga qodir ekanini ko’rsataylik. Keyin uni ko’paytirish va barchaning qurbi yetadigan darajaga keltirish ustida ishlaymiz”, - deydi u.
Qilinadigan ishlar hali ko’p, ammo kun kelib bu texnologiya dunyo oziq-ovqat sanoatida inqilob yasashi kutilmoqda.
Facebook Forum