Kobul sudi yil boshida bir to'da odam ayol kishini shafqatsizlarcha kaltaklab, o'ldirganini tomosha qilib turgan 11 politsiyachini bir yilga qamadi. Hibsdagilar orasida tuman politsiya mahkamasi rahbari ham bor. Yana sakkiz ofitser aybsiz topilib qo'yib yuborilgan.
Shu yilning 19-martida 27 yoshli ayol Farhunda Qur'onni yoqibdi degan yolg'on xabar tarqalgach, omma uni ayovsiz do'pposlagan. Kobul sudining aniqlashicha, 11 ofitser voqeani chetdan tomosha qilib turgan.
Mobil telefonda olingan videoda odamlar ayolni tayoq bilan urayotgani, uni tomdan tashlab, so'ng ustidan mashinada bosib o'tganini ko'rish mumkin. Uning jasadi yoqib yuborilib, so'ng daryoga tashlangan.
Voqea Afg'onistonda va boshqa davlatlarda keng ko'lamli norozilik namoyishlariga turtki berdi. Afg'oniston hukumati aybdorlarni jazolashga va'da bermoqda.
Bu ish yuzasidan 30 kishi va 19 politsiyachi ushlangan.
Shu oy boshida sud to'rt kishini o'limga hukm qilgan edi. Ular orasida ayolni Qur'onni yoqqanlikda ayblagan mulla Zaynul Obidin ham bor. Yana sakkiz kishi 16 yilga ozodlikdan mahrum qilindi.
