Qozog'istonlik 20 yashar talaba Azamat Tajayakov 2013-yilda Bostondagi terror xuruji bilan bog'liq tergovga g'ov bo'lganlikda aybdor topildi. Massachusets-Dartmut universiteti talabasi xurujni amalga oshirgan deb ko'rilayotgan Joxar Sarnayev bilan o'qigan.
Prokurorlarga ko'ra, Azamat 15-aprelda sodir etilgan xurujdan uch kun o'tib, boshqa bir do'sti bilan Sarnayevning ryukzagini yotoqxonadan olib chiqqan. Ma'lumotlarga ko'ra, ular sumkadagi mushaklarni tashlab yuborgan.
Hukm 16-oktabrda o'qiladi. Tajayakov tergovga halaqit bergani uchun 20 yilgacha va tergovga g'ov bo'lishni rejalagani uchun besh yilga qamalishi mumkin.
Bostonda uyushtirilgan yillik marafon paytida ro'y bergan portlashda uch odam o'lgan, 260 dan ziyodi jarohat olgan edi.
Aka-uka chechenlar Joxar va Tamerlan Sarnayevlar xurujda aybdor topilgan. Tamerlan politsiya bilan otishmada nobud bo'lgan, Joxar esa bir necha ayblov bo'yicha sudini kutmoqda.
Qozog'istonlik talaba Boston xurujiga aloqadorlikda aybdor topildi
- Amerika Ovozi
