Atrof-muhit muhofazasi, inson huquqlari himoyasi hamda xususiy sektor rivoji yo'lida beqiyos hissa qo'shayotgan bizneslar AQSh hukumati tomonidan mukofotlanadi. Bu yillik tanlov. Bu safargi sovrindorlar bilan tanishsak...
Mukofot sohiblaridan biri - tadbirkor Aron Fishman. Indoneziyaning qashshoq bir mintaqasida yong’oqni qayta ishlash bo’yicha yirik korxona ochgan. Asosan xotin-qizlarni ish bilan ta’minlaydi.
“Odam yollayotganimizda juda ko’p ayollar ariza topshirdi. Aynan kam daromadli aholini ish bilan ta’minlash uchun korxonamizni shaharda emas, qishloqda ochganmiz”, - deydi Fishman.
Davlat departamentiga ko’ra, AQSh xalqaro sahnada aynan shunday biznes faollikni quvvatlaydi.
“Global salomatlik, energetika va oziq-ovqat xavfsizligi, qochqinlar uchun maktablar ochish… Bu global maqsadlarga faqatgina xususiy sektorning omilkorligi va faolligi bilan erisha olamiz, - deydi diplomat Antoni Blinken.
Sovringa loyiq topilgan “Cargill” oziq-ovqat kompaniyasi Vyetnamda kakao yetishtiradigan dehqonlarni treningdan o’tkazgan.
“Weyerhaeuser” o’rmonchilik firmasi esa Urugvayda toza energiya loyihalari bilan muvaffaqiyat qozondi.
“Biz Urugvayda nafaqat o’z ehtiyojlarimiz uchun elektr ishlab chiqaramiz, balki ortiqchasini mahalliy korxonalarga sotamiz, ular esa aholiga”, - deydi kompaniya vakili Kristen Savin.
Korporativ a’lochilar mukofoti boshqa kompaniyalarni ham jahonda ijobiy o’zgarish qilishga chorlaydi, deydi tashkilotchilar.
