Iroq Kurdistoni prezidenti Masud Barzaniy lavozimidan ketishini tasdiqlamoqda. Uning vakolatlari vaqtincha bosh vazir, parlament va adliya organlariga topshiriladi.
Iroq shimolidagi avtonom hududni 2005-yildan beri boshqarib kelgan arbob qayta saylanish niyati yo'qligini parlamentga ma'lum qilgan.
Sentabrda kurdlar Iroqdan ajralib chiqish uchun referendumda ovoz bergan edi. Bag'dod natijani tal olmadi va kurdlar nazoratida bo'lgan hududlarga qo'shin yuborib, neft konlarini tortib oldi. Kirkuk shahri markaziy hukumatga boy berilgani ketidan Masud Barzaniyga nisbatan tanqidlar kuchaygan.
Kirkuk atrofidagi harbiy amaliyotlar sabab 1-noyabrga belgilangan prezident va parlament saylovlari ham qoldirilgan.
Kurd hukumati referendum natijasini "muzlatib", Bag'dod bilan muloqot qilishga rozi. Ammo Iroq Bosh vaziri Haydar al-Abadiy taklifni rad etgan. Mamlakat yaxlit bo'lib qoladi, deydi u.
Iroq armiyasi kurdlardan tortib olgan hududlarni yaqingacha "Islomiy davlat" jangari guruhi boshqarar edi.
Facebook Forum