AQShning so'nggi jangovar askari Iroqni tark etdi

AQSh-Iroq kelishuviga ko'ra yil oxirigacha chiqarilishi kerak bo'lgan Amerika askarlarining so'nggi kolonnasi bugun mamlakatni tark etdi. Bir necha yuz kishidan iborat harbiylar karvoni qo'shni Quvaytga yo'l oldi. Iroqda AQSh elchixonasini qo'riqlash uchun yuzdan ortiq askar qolgan xolos.

Shu bilan salkam to'qqiz yillik urush nihoyasiga yetdi. AQSh 4500 askaridan ayrildi. O'n minglab iroqliklarning yostig'i quridi. Urush avjiga chiqqan payt Iroqda AQShning 170 mingdan ziyod askari bo'lib, ular 500 dan ortiq bazalarda joylashgan edi.

Urush tanqidchilariga ko'ra, Amerika istilosi oqibatida mamlakat vayron bo'lib, urush minglab odamlarni beva-bechora, yetim-yesir qildi, mazhablararo zo'ravonlik Iroq xalqlarini bo'lib qo'ydi.