Rossiya xavfsizlik kuchlari "Islomiy davlat" jangari guruhiga aloqadorlikda gumonlangan yetti kishini hibsga olgan. Qo'lga olingan shaxslar Moskva, Sankt-Peterburg shaharlarida va Sverdlovsk viloyatida terror xurujlarini rejalaganlikda ayblanmoqda.
Federal Xavfsizlik xizmati e'lon qilgan bayonotga ko'ra, ayblanuvchilar Yekaterinburg shahrida qo'lga olingan. Ular xurujlarni amalga oshirib, so'ng Suriyaga jo'nab ketishni rejalayotgan edi, deyiladi bayonotda.
Qo'lga olinganlarning uyi tintuv qilinganda, qurollar, granatalar, portlovchi moddalar va bomba yasovchi laboratoriya topilgan.
Guruh rahbari "Islomiy davlat"ning a'zosi bo'lib, Rossiyaga Turkiya orqali kirgani aytilmoqda.
