AQSh Davlat kotibi Reks Tillerson rohinja qochoqlari taqdirini muhokama qilish uchun Myanmaga keldi. Shu masalada u mamlakat yetakchisi Au San Su Chi va armiya qo'mondoni bilan muzokaralar olib bormoqda.
Au San Su Chi bilan o'tkazilgan matbuot konferensiyasida Tillerson rohinja musulmonlariga qarshi sodir etilgan zo'ravonliklar yuzasidan mustaqil tekshiruv o'tkazish maqsadga muvofiq bo'lishini aytdi.
"Rakxayn shtatidagi inqiroz Myanma o'tgan yili yangi hukumat saylangandan beri yuzlashayotgan eng katta muammolardan biridir. Rakxayn shtatidagi zo'nggi xurujlarda Myanma xavfsizlik kuchlari va ular nazorat ostiga olmagan bosqinchilar tomonidan keng miqyosli zo'ravonliklar sodir etilgani haqidagi xabarlardan qattiq tashvishdamiz. Yuz minglab erkaklar, ayollar va bolalar qochishga majburlanganidan ham xavotirdamiz", - dedi Tillerson.
Tillerson armiya qo'mondoni Min Au Hlang bilan ham uchrashdi. Rohinja qishloqlariga o't qo'yib, ko'plab odamlarni o'ldirish kampaniyasi ortida aynan harbiylar turgani aytiladi.
Rakxayn shtatidagi voqealar tinchlik bo'yicha Nobel mukofoti sovrindori va demokratiya kurashchisi sifatida tanilgan Au San Su Chining obro'siga ancha putur yetkazdi. Chunki u zo'ravonliklarni qoralashni va oz sonli rohinja elatini himoya qilishni istamadi.
Mamlakatda harbiylar ta'siri kuchli bo'lgani uchun G'arb hukumatlari shu paytgacha Au San Su Chini ochiq va keskin tanqid qilishdan tiyilib kelmoqda.
Facebook Forum