Germaniya kansleri Angela Merkel bugun Turkiyada rasmiylar bilan uchrashib, Yevropaga oqib kelayotgan migrantlar taqdiri xususida gaplashmoqda. Merkel Bosh vazir Ahmat Dovuto'g'li va Prezident Rajab Toyib Erdog'an bilan ko'rishgan.
Dovuto'g'lining uchrashuvdan so'ng matbuotga bildirishicha, Turkiya noqonuniy migratsiyaning oldini olishda Germaniya bilan hamkorlikka tayyor, biroq buning uchun avval Suriya mojarosi hal etilishi darkor.
"Suriya armiyasi va "Islomiy davlat" jangarilarining Halab yaqinidagi olishuvi qochqinlarning yangi to'lqiniga turtki berishi mumkin", - deydi Turkiya bosh vaziri.
Anqara migrantlarning Yevropa tomon oqimini cheklashda yordam bersa, Yevropa Ittifoqi unga moliyaviy ko'mak taklif etmoqda hamda ayrim masalalarda yon berishga tayyor. Xususan, Turkiyada boshpana olgan qochqinlar uchun uch millliard dollar ajratiladi, turk fuqarolarining Yevropaga viza olishi osonlashtiriladi, mamlakatning Yevropa Ittifoqiga a'zo bo'lishiga qaratilgan muzokaralar jadallashtiriladi.
