Afg’oniston yoshlari AQShning qo’shinlarini 11-sentabrgacha mamlakatdan olib chiqish qaroriga xavotir bilan munosabat bildirmoqda. Ular Kobuldagi markaziy hukumat va Tolibon harakatini imkon qadar tez tinchlikka erishishga chaqirmoqda. Yoshlar tinchlik kelishuvi amal qilgunga qadar AQSh harbiylari mamlakatda qolsa yaxshi bo’lar edi, deydi.
Your browser doesn’t support HTML5
Xalqaro hayot – 22-aprel, 2021-yil
“Tinchlik mamlakat bo’ylab qaror topmaguncha, vatanimiz taqdiri hal bo’lmaguncha ular ketmay tursa yaxshi edi”, - deydi hirotlik Safiulla Raseh.
Ba’zi afg’onlar Amerika qo’shinlari mamlakatni tark etishi bilan Tolibon hokimiyatni qo’lga olishga harakat qilishidan xavotirda.
“Amerikaliklar Afg’onistondan chiqib ketsa, vaziyat yomonlashadi. Tolibon davriga qaytamiz deb qo’rqaman”, - deydi yana bir hirotlik Odila Omid.
Afg’on yoshlarining aytishicha, ko’p yillik ixtilofga barham berish uchun har ikki tomon murosa qilishga tayyor bo’lishi lozim.
“Barcha taraflar bu imkoniyatdan unumli foydalanishi kerak. Istanbul anjumani tinchlikni o’rnatish uchun yaxshi imkoniyatdir”, - deydi g’aznilik Muhammad Rahim Oriyo.
Tolibon AQSh qo’shinlari 1-maygacha ketmasa, muzokaradan chiqishini bildirmoqda. Tolibon muzokaralarni boykot qilsa, deydi ayrim afg’onlar, zo’ravonliklar kuchayishi mumkin.
“Tolibon Turkiyaga borsa, tinchlik uchun imkoniyat tug’iladi. Borishmasa, to’qnashuvlar davom etadi, xavfsizlik izdan chiqadi”, - deydi balxlik Laylo Arshya.
Afg’oniston hukumati va Tolibon vakillari 24-aprel kuni Istanbuldagi tinchlik anjumanida qatnashishi kutilmoqda.