Kecha Vashingtonda o'tgan konferensiyada 100 dan ortiq musulmon yetakchilari yig'ilib, radikalizmga qarshi kurash, bir million musulmon saylovchini kelasi yildagi saylovda ovoz berish uchun ro'yxatdan o'tkazish hamda boshqa din vakillari bilan aloqalarini kuchaytirish bo'yicha milliy kampaniya boshlashga kelishib oldi.
Yig'in dunyoda "Islomiy davlat" terrorchi to'dasi xurujlari kuchaygan hamda San-Bernardinoda 14 kishining o'limiga sabab bo'lgan qonli xuruj ketidan musulmonlarga qarshi kayfiyat kuchaygan bir paytda o'tkazildi.
Shimoliy Amerika musulmonlar alyansi rahbari imom Johari Abdul Malik yoshlar bilan ishlash bo'yicha chora-tadbirlar kuchaytirilayotganini aytdi.
Falastinga hamdard amerikalik musulmonlar guruhidan Kristin Szremski esa terrorizmni qoralash va boshqa jamoatlar bilan yaqindan aloqaga chiqish bo'yicha musulmonlar ko'proq ish qilishlari kerak, degan fikrni olg'a surdi.
Kaliforniyadagi xuruj ketidan musulmonlarga qarshi kayfiyat va jinoyatlar soni oshgani kuzatilmoqda. Yig'inda musulmonlarning "Islomiy davlat" kabi terror guruhlarini keskin qoralashini va bunday guruhlarning Islomga aloqasi yo'qligini ko'proq amerikaliklarga tushuntirish zarurati borligi tilda olindi.