Iroq kuchlari Ramadi shahrida davlat idoralari majmuasini "Islomiy davlat" jangari guruhidan tortib olish uchun yana bir hujumga hozirlanmoqda.
Majmua yetti oy oldin terrorchilar qo'liga tushgan edi. Uning atrofiga minalar terib chiqilgani aytilmoqda. Bu esa vazifani qiyinlashtirishi mumkin. Minalarni portlatish uchun havodan zarbalar berilmoqda.
Iroq armiyasining bildirishicha, "Islomiy davlat" xudkush bombachilar, bombali qopqonlar, snayperlarni ishga solmoqda, aholidan jonli qalqon sifatida foydalanmoqda. Hududda qancha odam qolgani ma'lum emas. Aksariyati yaqin atrofdagi kasalxonada yashiringani aytilmoqda.
Ramadi may oyida jangarilar nazoratiga o'tgan edi. Armiya uni bir necha kun ichida qaytarishga umid qilmoqda.