O'zbekistonlik "terrorist" AQShda 260 yillik qamoqqa mahkum etildi

2017-yilning 31-oktabrida Nyu-Yorkda sakkiz begunoh insonni o'ldirganlikda va "Islomiy davlat" terror guruhini quvvatlaganlikda aybdor deb topilgan 34 yoshli o'zbekistonlik Sayfullo Soipov har bir qotillik uchun umrbod qamoq jazosiga loyiq, deya e'lon qildi Nyu-York federal sudi.

17-may kungi qarorga ko'ra, Soipov jami 260 yilga ozodlikdan mahrum etilmoqda. Ya'ni, u hayot ekan, panjara ortida eng keskin rejim ostida qoladi.

Soipov shu yilning 26-yanvarida 28 ayblov bo'yicha jinoyatchi deb qayd etilgan edi, jumladan, terror tashkiloti nomidan odam o'ldirish, qurolli hujum, "Islomiy davlat"ga moddiy yordam va buzg'unchilik.

Unga o'lim jazosi berilsinmi yo umrbod qamoq, degan savol ustida bosh qotirgan sud hay'ati bir to'xtamga kela olmagach, masala federal sudyaga uzatilgan edi.

Buni ham ko'ring

Nyu-York: Sayfullo Soyipovning yaqinlari sudda so'zladi

AQSh Adliya vaziri Merrik Garland deydiki, Soipov o'ldirgan insonlar unutilmaydi.

“Biz Amerika xalqqini terroristlar va terrorizmdan himoya qilamiz. Bunday xurujlar qilganlar qonunlarimiz oldida javob beradi va jazosini oladi".

Federal qidiruv byurosi direktori Kristofer Rey bayon qilishicha, Soipov besh yil oldingi qabih jinoyati uchun eng keskin chora bilan yuzlashayotgani singari har qanday terroristik qadam pirovardida adolat zarbasiga uchraydi.

Nyu-Yorkda Soipov ishi bilan shug'ullangan prokuror Demiyan Uilyamsning aytishicha, sud muhokamalarida 20 dan ortiq amerikalik so'zlab, o'lgan yaqinlari uchun adolat talab qilgan. Sudya ularga tovon belgilashi kutilmoqda.

"Qotil bu jazolarga loyiq", - deydi Uilyams.

Soipov ijaraga olingan yuk mashinasida Nyu-Yorkning markaziy ko'chasida odamlarni ataylab bosgan. Sakkiz kishi o'sha joyda halok bo'lgan. Yana o'nlab insonlar jarohatlangan.

Qo'lida qurol ko'targan Soipov bu ishlarni islom va "Islomiy davlat" yo'lida qilganini bot-bot tilga olgan.

Sudlov jarayonida ham ayblanuvchi qilmishidan afsusda emasligini, imkon bo'lsa yana shunday harakatlarni amalga oshirishga tayyorligini ta'kidlagan. "Islomiy davlat" Soipovning xurujini qahramonlik deya maqtab chiqqan.

Hibsda u qo'riqchilarning kallasini olish haqida o'ylab yurganini aytgan. Soipovning sudida O'zbekistondan oilasi, xususan onasi qatnashgan. Yaqinlari unga o'lim jazosi bermaslikni iltimos qilgan.