Kongressdagi demokratlar Trampdan shaffoflik talab qilmoqda

Kongressdagi demokratlar Prezident Donald Trampga har qanday o'zgarish oshkora kechishi zarurligini eslatmoqda. Aks holda ular imkon qadar to'siqlar qo'yishga bel bog'lagan.

Prezident Trampning yaqin maslakdoshi Ilon Mask boshliq Hukumat samaradorligini oshirish departamenti AQSh Xalqaro taraqqiyot agentligini ishdan to'xtatib, uni Davlat departamentiga qo'shish harakatida. Agentlik "Amerika birinchi" talablariga javob berishini ta'minlaydi, deya bildirmoqda ma'muriyat.

Buni ham ko'ring

AQSh qonunchilari tashqi yordamning muzlatilishini savol ostiga oldi

"Nimaiki qilishayotgan bo'lsa-da, demokratik emas, - deydi Senatda demokratlar sardori Chak Shumer. - Demokratiya nima ekanini bilamiz. U oshkoralikdir".

Vaziyatdan norozi demokratlar hukumat xarajatlarini ma'qullash uchun ovoz bermasligi mumkin. Amaldagi byudjet 4-martda bitadi.

Vashington yuragida kechgan namoyishga liberal siyosatchilar yetakchilik qildi.

"Biror agentlikni o'zgartiqmoqchimisiz, bu borada qonun loyihasi tanishtirilishi va muhokama qilinishi shart", - deydi demokrat senator Brayan Shatz.

"Sizga yoqmagan agentlikni prezident farmoni bilangina yopa olmaysiz, unga bostirib kira olmaysiz. Amerikada tizim bunday ishlamaydi".

4-fevral kuni AQSh poytaxtida minglab odamlar demokrat qonunchilar rahnamoligida Oq uy va Moliya vazirligi oldida Prezident Tramp va uning yaqin maslahatchisi Elon Mask xatti-harakatlarini qoralab, namoyish qildi. Ularga ko'ra, Mask boshliq guruh hukumatni noqonuniy ravishda egallab, fuqaro huquqlarini va bosh qomusni buzmoqda. Oq uyga ko'ra esa Mask va uning guruhi islohot olib bormoqda, tizimda mas'uliyatni oshirishga bel bog'lagan. Shu kunlarda bu guruh Moliya vazirligini tekshirgan, uning to'lov tizimiga kirgan, shuningdek, AQSh Xalqaro taraqqiyot agentligini yopgan.

AQSh Xalqaro taraqqiyot agentligiga har yili o'nlab milliard dollar ajratiladi.

"Konstitutsiyaga binoan mablag' prezident va uning ma'muriyati tomonidan sarflanadi", - deydi Vakillar palatasida demokratlar yetakchisi Hakim Jeffris.

"Prezident qonunlarga amal qilinishini ta'minlashi shart. Kongress ajratgan mablag' to'g'ri yo'naltirilmasa, qonun va bosh qomus buzilayotgan bo'ladi. Shu bois ham hozirda bir qancha sud ishlari boshlangan", - deydi kongressmen.

Kongressdagi respublikachilar Tramp ma'muriyati xatti-harakatlarini yoqlamoqda.

Buni ham ko'ring

AQSh Xalqaro taraqqiyot agentligi Davlat departamentiga qo'shiladi

"Nazarimda, hukumat agentlikni yopmayapti, balki uning faoliyati va mablag' qanday sarflanganini tekshirmoqda", - deydi Senatda respublikachilar lideri Jon Tyun.

"Har qanday ma'muriyat shunday qiladi. Ular ish boshlar ekan, dasturlar qayta ko'rib chiqiladi, qay biri belgilanganidek ishlayapti, qay biri yo'q. Mablag' to'g'ri sarflanayaptimi yoki yo'q", - deydi senator Tyun.

Oq uy AQSh Xalqaro taraqqiyot agentligining irqiy, etnik va diniy xilma-xillik hamda tenglik bilan bog'liq loyihalarini tanqid qilib, ularni isrofgarchilik deb topgan.

"Keng ko'lamli firibgarlik aniqlansa, mablag' Kongress ma'qullaganidek va prezident imzolaganidek sarflanmayotgan bo'lsa, buni biz bilishimiz kerak", - deydi respublikachi Rojer Uiker, Amerika telekanallari bilan suhbatda.

"Menimcha, AQSh Xalqaro taraqqiyot agentligi dasturlari Xitoyning dasturlariga nisbatan javob sifatida ishlashi, uning ta'sirini pasaytirish uchun chora bo'lishi kerak, jumladan Afrika, Janubiy Amerika va g'arbiy yarimsharda".

"Bizga Xitoy harakatlariga kuchli raqib bo'ladigan proyektlar kerak. Va bu ish bizning siyosatchilarimiz tasdiqlaganidek yo'lga qo'yilishi shart", - deydi senator Uiker.

Senator Shumer ham firibgarlikka qarshi, ammo Tramp ma'muriyati kurashni yopiq olib bormoqda, deydi.