Turkiston-Amerika Uyushmasiga 1958 yil Nyu-York shahrida asos solingan. U payt Amerikada markaziy osiyoliklar ko'p bo'lmagani uchun oz sonli vatandoshlar bilan aloqada bo'lish juda muhim edi. Asta-sekin AQShga Turkiya, Afg'oniston, Saudiya Arabistoni, Xitoy va boshqa mamlakatlardan o'zbeklar ko'chib kela boshlagan.
Yillar davomida jamiyat a'zolari O'zbekiston va Markaziy Osiyodagi boshqa mamlakatlarning ozod bo'lishini orzu qilishgan, chunki Sovet davrida ota-yurtga borish ular uchun amri mahol edi. O'zbekiston mustaqilligi ularga vatan tuprog'ini ko'zga surtish imkoniyatini berdi.
Uyushmaning ko'p yillik raisi Abdulla Xo'jaga ko'ra, bugunga kelib jamiyatga mingga yaqin kishi a'zo. Aksariyati Nyu-Jersi shtatining Parsippani shahrida yashaydi.
Amerikada o'zbeklar soni oshgan sari yangi markazga ega bo'lish zarurati paydo bo'ldi. O'tgan yili jamiyat shtatning Dover shahrida ikki qavatli imorat sotib olgan. Respublikadan kelgan usta va naqqoshlar esa uni o'zbekona uslubda bezagan.
Kechaga tashrif buyurgan O'zbekistonning AQShdagi elchisi Abdulaziz Komilov prezident Islom Karimovning o'zbek jamoasiga tabrigini yetkazdi.
Jamiyat a'zolarining 90 foizi o'zbeklar. Keksalar Turkistonni qo'msab yashaydi. Yoshlar esa Amerikada tug'ilgan bo'lsada, katta yoshdagilar nasihati bilan o'zbek madaniyati va urf-odatlari, tili hamda islom dinidan boxabar bo'lishga harakat qiladi.
Kechada amerikalik o'zbek qizaloqlar vatan va ona haqida she'r aytib, milliy raqs ijro etdilar.
Turkiston-Amerika Uyushmasi rahbarlariga ko'ra, jamiyat so'nggi paytda siyosiy tarafdan faollashmoqda. O'zbeklar yashaydigan Parsippani shahar meri uchun bo'lgan saylovlarda jamoa ovoz bergan nomzod g'alaba qozondi.
Prezident saylovlarida amerikalik o'zbeklarning aksariyati Barak Obamaga ovoz bergan. Saylovlardan so'ng esa jamoa rahbariyati unga tabrik maktubini yo'llab, AQShning bo'lajak prezidentini Markaziy Osiyo va xususan O'zbekiston bilan faol hamkorlikka chaqirgan.
