Daish Xuroson – Afg’onistonda “Islomiy davlat” o’zini shu nom ostida targ’ib qiladi. AQSh maxsus kuchlari guruh bilan ikki yildan beri urushda. Amaliyotlar boshlangan paytda “Amerika Ovozi” Nangarhor viloyatining Achin tumaniga borib, vaziyat bilan tanishgan edi. Shafqatsiz hujumlar va qonxo’rlikdan aziyat chekkan aholi bilan muloqot qilgan edik. O’tgan ikki yil ichida nima o’zgardi? Afg’on qurolli kuchlari AQSh va NATO bilan hamkorlikda terrorchilarga qarshi shiddatli kurash ketayotganini aytadi.
Bolalar mahallada begona odam yurganini darrov ilg’aydi. Bir yil oldin ular ajnabiylarning oldiga yugurib bormagan bo’lar edi.
“Hududimiz “Islomiy davlat” tomonidan bosib olinganidan keyin zulmatda yashadik. Uy-joyimizni tashlab qochdik. Mana yaqinda qaytib, hayotimizni tiklayapmiz”, - deydi mahalliy fuqarolardan biri.
Afg’onistonning sharqiy qismi terrochilar qo’lida bo’lgan paytda aynan bu tuman, Achin, doimiy dahshatda yashadi. “Islomiy davlat” shu yerda kuch to’pladi. Afg’on armiyasi yaqinlasha olmas edi.
Hukumat kuchlari aholini terrorchilardan himoya qilish uchun yetib kelgunicha uzoq vaqt o’tdi. Odamlar qirildi, qolganlar azoblandi. Terrochilar hatto o’zi bosib olgan hududni chegaralab qo’ygan edi. U yerdan hech kim chiqa olmas, harakat qila olmas edi.
Hozir esa hudud erkin, ochiq. Hayot normallashgan. Lekin tuman vayrona. Urushdan qolgan manzara.
NATO bombalari tushgan imoratlar. Mahalliy bozor kichik. Ikki do’kon ochiq xolos.
Lekin tirikchilik qilishayapti. Ayollar ko’chaga bemalol chiqa oladi. “Islomiy davlat” davrida xuddi toliblar singari ular ham xotin-qizlarni tashqariga qo’ymas edi.
“Sog’liqni saqlash tizimini tiklash kerak. Ta’lim maskanlarini qayta ochish kerak. Eng dolzarb masalalar shu. Hamma narsani qayta qurish kerak. Madadga muhtojmiz”, - deydi yana bir fuqaro.
Xuddi urush paytidagidek, osmonda qiruvchi samolyotlarni ko’rasiz. Ularning ovoziga mahalliy aholi o’rganib ketgan.
Facebook Forum