Qirg'iziston sudi o'zbek huquq faoli, 2010-yil janubdagi qirg'in ketidan umrbod qamalgan Azimjon Asqarov ishini qayta ko'rib chiqqan. 4-oktabr kungi tinglov ketidan uning hukmi kuchda qoldirilgan.
Jurnalistlarni himoya qilish qo'mitasi Asqarovni zudlik bilan ozod qilishga chaqirib keladi. BMT Inson huquqlari qo'mitasi yil boshida huquq faoliga qo'yilgan ayblovni olib tashlab, uni qo'yib yuborishga da'vat etgan edi.
Asqarov 2010-yilning yozida Jalol-Obodda, jumladan, militsiyaga qarshi jinoyatda ayblanib ushlangan, shundan beri turmada qolmoqda. U, xususan, militsiya xodimi Miktibek Sulaymonovning o'limida, elatlararo nafratni avj oldirganlikda ayblanayapti.
Chuy viloyati sudi Asqarov advokatlarining uni qo'yib yuborish haqidagi iltimosini rad etgan. Huquq faoli qamoqda qoladi.
Asqarov "Vozdukh" ("Havo") nomli huquq tashkilotiga asos solib, uzoq yillar Qirg'izistondagi qonunbuzarliklarni xatlab qolgan.
Jurnalistlarni himoya qilish qo'mitasi va qator huquq tashkilotlari Asqarovning ishi davomida u qiynoqqa solingani, ayblovlar uchun dalillar yetishmasligi, mahbus nihoyatda g'ayriinsoniy bir sharoitda saqlanayotgani kabi qonunbuzarliklarni qayd etgan.
U Bishkek yaqinidagi koloniyada jazoni o'tamoqda. Uning oilasining aytishicha, Asqarovning sog'ligi juda og'irlashgan.
Huquq faoli barcha ayblovlarni rad etib keladi.
