Amerikaning 1974-77 yillardagi rahbari Jerald Fordning rafiqasi Betti Ford 93 yoshida vafot etdi.
U nafaqat prezident ayoli, balki xotin-qizlar huquqi uchun kurashgan, ichkilikbozlik va giyohvandlikka qarshi tibbiy tashabbuslar boshida turgan arbob sifatida tarixga kirgan.
1918 yilda Chikago shahrida tavallud topgan va 1930-40 yillarda Nyu-Yorkda raqqosalik qilgan va moda yulduzi bo’lgan.
Oq Uydalik paytida Betti Ford ko’krak raki bilan olishgan. Eri Jerald Ford prezidentlikdan ketgan yillarda rafiqasining alkogolik ekani oshkor bo’lgan.
1980-yillarda Betti Ford uzoq payt kasalxonalar va boshqa davolanish maskanlarida yotgan.
Fordlardan to’rt farzand qoldi. Jerald Fordning o’zi 2006 yilda vafot etgan edi.
Jerald Ford prezidentlikka, Richard Nikson siyosiy mashmashalar natijasida rahbarlikdan ketgach, kelgan. Bu voqealar "Votergeyt skandali" deya nomlanadi.
Respublikachi Nikson Demokratik partiyaning Vashingtondagi bosh idorasiga maxfiy moslamalar o'rnatib, saylov kampaniyasi rejalarini zimdan kuzatib, ayg'oqchilik qilish ishlariga ruxsat berganini tan olgan.
