Amerikaning yirik shtatlaridan biri – Kaliforniya 2008-2009 yillarda kuzatilgan iqtisodiy krizis asoratlaridan haligacha tuzalmagan.
Ishsizlik bu mamlakatda o’rta hisobda 9 foiz bo’lsa, Kaliforniyada bu ko’rsatkich 12 foizga teng. Ayniqsa ko’chmas mulk bozori xarob ahvolda. Biroq qator sanoatlar sekin-asta jonlanmoqda.
Krizisdan qiynalgan bo’lsada, Kaliforniya iqtisodiyoti hamon baquvvat. Butun boshli davlatlar bilan tenglasha oladi. Hajmi jihatdan dunyoda sakkizinchi o’rinda.
Xalqaro savdo izga tusha boshlagani ijobiy yangilik. Los-Anjelesda biznesni rivojlantirish korporatsiyasi vakili, iqtisodchi Nensi Siduning aytishicha, texnologiya sohasi ham gurkirab o’smoqda.
“Internetda har kuni bir kashfiyot. Mobil telefonlar uchun yangi programmalar, ommabop saytlarni aytmaysizmi",- deydi mutaxassis.
Apple, Google va ularga ergashayotgan boshqa kompaniyalarga iqtidorli odamlar kerak.
Amerika iqtisodiyoti ko’p jihatdan iste’molchi va uning xarid quvvatiga tayanadi. Chakana savdoda gap ko’p.
Los Anjeles shahrida tadbirkorlik qiluvchi Liang Liang deydiki, hozir xomashyo qimmat va mahsulotga talab past.
Paxtadan qilingan futbolkalar narxi, deydi u, yil boshidan beri 25 foizga oshdi.
Kaliforniyada odamlar vaqtincha bo’lsa ham ishga joylashyapti.
Professional xizmatlarga talab oshgan, huquqshunos va hisobchilarning bozori chaqqon.
Gollivud, Amerika kino sanoati markazi ham ulkan daromad manbai. Yiliga yuzlab ming kishini ish bilan ta'minlaydi.
Informatsion texnologiyalar vatani shu yer. Bu sektorga kiritilayotgan milliardlab dollar sarmoyadan Kaliforniya katta daromad oladi.
Lekin 10 milliard dollarga teng byudjet kamomadini yopish hazil gap emas. O’qituvchilar, davlat xizmatchilari ishidan ayrilishi mumkin.
