Dissident Chen Guanchen Pekinda Amerika elchixonasini tark etdi

AQSh rasmiylarining bildirishicha, Pekinda uy qamog'idan qochib, Amerika elchixonasida qo'nim topgan ko'zi ojiz dissident vakolatxonani tark etgan. U tibbiy yordamga muhtoj va oilasi bilan ko'rishmoqchi, deydi ular. Q 'shma Shtatlarning bildirishicha, Chen Guanchen siyosiy boshpana so'ramagan.

Xitoy bilan xavfsizlik va iqtisodiy masalalar borasida muzokara qilish uchun Pekinga borgan AQSh Davlat kotibasi Xillari Klintonning aytishicha, Chen o'z xohishi bilan elchixonadan ketgan. Ma'lum bo'lishicha, dissident diplomatik vakolatxonada olti kun turgan.

Xitoy Tashqi ishlar vazirligi Chenni elchixonaga qabul qilgani uchun Vashingtondan uzr so'rashni talab qilmoqda. AQSh Xitoy ichki ishlariga aralashdi, deyiladi vazirlik bayonotida.

Inson huquqlari bilan shug'ullanuvchi Human Rights Watch tashkiloti vakili Felim Kaynning aytishicha, Chenni Xitoyga topshirish bo'yicha olib borilgan muzokaralarda rasmiy Pekin unga ozor bermaslikka so'z bergan.