Markaziy Osiyo xalqlari orasida qirg’iz va qozoq eli bir-biriga har jihatdan yaqin sanaladi. Tili, yuz tuzilishi, taomlariyu ust-boshi o’xshash.
Qirg’izistonda aholining bir foizi, ya’ni taxminan 40-45 ming kishi qozoqlar. Ko’pi Qozog’iston bilan chegara yaqinida yashaydi. Jamoa uchun tili va madaniyatini saqlab qolish – dolzarb mavzu.
15 yil muqaddam O’sh viloyatida tashkil topgan Qozoq milliy-madaniy markazi an’analarni ardoqlab, yoshlarga ta’lim sohasida yordam berishni maqsad qilgan.
Markaz rahbari Dauranbek Jaymagambetovning aytishicha hozirda O’sh shahrida 300 dan ortiq qozoq yashaydi.
“Tilni chuqurroq o’rgatish yo’llarini izlayapmiz”, - deydi u.
Hozir Qirg’iziston janubida yashovchi qozoqlarning ko’pi rus va qirg’iz tillarida so’zlashadi.
“Qozoqlar tilni unutmasligi kerak deb hisoblayman. Ota-onalarga farzandlar bilan qozoqcha gaplashing, deymiz. Qirg’iz tilini ham, albatta, bilish kerak. Inson o’z ona tili, urf-odatlari, kuy va raqslarini bilisi darkor”, - deya davom etadi Jaymagambetov.
Markaz Qozog’iston bilan aloqa o’rnatgan va ta’lim, madaniyatga doir masalalarni yechishda millatdoshlar ko’magiga tayanadi.
“Qozoq tilidan darsliklarimiz yo’q edi. Bu yil Qozog’iston elchihonasi bizga kitoblar berdi. Qozoq oilalariga tarqatmoqdamiz”, - deydi suhbatdosh.
Aksar jamoatchilik tashkilotlari kabi Qozoq madaniy markazi pul jihatdan qiynalib qolgan. Oddiy milliy libos, tadbirlar uchun ust-bosh yo’q.
“Qozoq milliy liboslarini tiktirish uchun mablag’imiz yetmaydi. Men o’zim ham bepul, volontyor qatori ishlayman. Yordam so’rab keladiganlar ko’p”, - deydi u.
Iqtisodiyoti oqsayotgan, beqaror Qirg’izistondan bosh olib ketayotganlar orasida qozoqlar ham bor. Ko’pi ona yurtga yo’l olgan.
Qirg’izistonda qolayotgan qozoqlar esa “kindik qonim to’kilgan yurt shu” deydi. Yaxshi-yomon kunlarni mana shu davlatda, qardosh elatlar bilan birga baham ko’rishni afzal biladi ular.
