Isroil va Falastin AQSh pozitsiyasidan norozi

AQSh Davlat kotibasi Xillari Klintonning Yaqin Sharq tinchlik jarayoniga munosabati Isroil va Falastin tanqidiga uchragan. Klinton jarayondan tashvishda ekanini bildirgan.

Isroil Iordan daryosining g'arbiy sohilida qurilishlarga qo'yilgan 10 oylik moratoriyni sentabr oyida uzaytirishdan bosh tortishi natijasida falastinliklar qiyinchliklar bilan yo'lga qo'yilgan muzokaralardan chiqqan edi. Jarayonga vositachilik qilayotgan Qo'shma Shtatlar Isroilni qurilishlarni to'xtatishga ko'ndira olmagach, Klinton o'zga usullardan foydalanish kerak, deya muzokaralarning keyingi bosqichida bo'lajak Falastin davlati chegaralarini aniqlash kerak, deb chiqdi.

"Har ikki davlat yagona chegaraga kelishishi lozim", - deydi Klinton.

Isroilning millatchi siyosatchilaridan bo'lmish Tashqi ishlar vaziri Avidgor Liberman Klinton so'zlarini sovuqqonlik bilan qarshiladi.

"Agar kimdir chegaralar muammoni hal qiladi deb o'ylayotgan bo'lsa, xato qiladi. Isroil 2005-yilda G'azo Sektoridan qo'shinlarni butunlay chiqardi, ammo tinchlikka erishmadi, aksincha sektor boshqaruvini qo'lga olgan falastinliklar terror va ekstremizm urug'ini sochib, Isroilga raketalar yog'ila boshladi", - deydi Liberman.

Uning aytishicha, Isroil muzokaraga qaytishga tayyor, ammo hech bir shart-talablarsiz.

Falastinliklar ham Klinton pozitsiyasidan tashvishda. Ularning aytishicha, davlat kotibi muloqotning to'xtab qolganida har ikki tomonni birday ayblab, xato qilmoqda.

Falastin bosh muzokarachisi Soib Erekatning aytishicha, Isroil qurilishlarni tinchlikdan ustun qo'yib, muloqotning izdan chiqishiga asosiy sababchidir.

AQShning Yaqin Sharq bo'yicha maxsus vakili Jorj Mitchell bugun mintaqaga yo'l olmoqda. Har ikki tomonni murosa qilishga chorlashi kutilmoqda. Bugun Quddusda Isroil Bosh vaziri Benyamin Netanyaxu bilan uchrashadi.

Netanyaxuning aytishicha, Isroil Quddus shahrining bo'linishiga qarshi. Ma'lumki, Falastin Sharqiy Quddusni bo'lajak davlatining poytaxti sifatida ko'radi. Ertaga esa Mitchell Ramallohda Falastin rahbari Mahmud Abbos bilan muloqot qiladi. Bu AQSh maxsus elchisining mintaqaga so'nggi uch oyda ilk safari.