Isroil Bosh vaziri Benyamin Netanyaxu Falastin davlatini tuzishga qarshi ekanini aytishi ketidan Amerika rahbari Barak Obama ikki davlat aloqalarini qayta ko'rib chiqmoqchi.
Obama kecha Netanyaxu bilan telefonlashib, ana shu haqda gaplashgan. Suhbat paytida Oq uy rahbari Netanyaxuni parlament saylovlarida g'alaba bilan ham tabriklagan.
Isroil bosh vaziri saylovdan oldin qilgan targ'ibot kampaniyasi paytida Falastin davlatini aslo qo'llab-quvvatlamasligini aytgan edi.
Payshanba kungi chiqishida u bu fikridan qaytib, quroldan voz kechgan Falastin davlatining yaralishiga qarshi emasligini ta'kidlagan.
Isroil Falastin ahli o'z mamlakati uchun mo'ljallayotgan yerlarda yahudiylar uchun posyolkalar qurishda davom etayapti.
Buning ustiga, Netanyaxu jahon hamjamiyati va Eron o'rtasida yadro dasturi yuzasidan kechayotgan muzokaralarga qat'iyan qarshi. Bu ziddiyat azaliy ittifoqchilar Isroil va Amerikaning aloqalarini taranglatirgan.
