Britaniya qirolligining ikki yulduzi, shahzoda Vilyam va uning rafiqasi Keyt Kanadaga to'qqiz kunlik sayohatini yakunlab, kechadan Amerika safarini boshladi.
Bugun shahzoda Kaliforniya shtati Santa Barbara shahrida zodagonlar o’yini bo’lmish polo o’ynadi. Odamlar uni tomosha qilish uchun minglab dollar to'lagan, Vilyam bilan o'ynash kamida 60 ming dollar. Tushgan mablag', deydi tashkilotchilar, xayriya qilinadi.
Kecha juftlik Los-Anjelesda texnologik anjumanda qatnashib, Britaniya firmalari manfaati uchun gapirgan, amerikalik ishbilarmonlarni sarmoya ko’lamini oshiriishga chaqirgan.
Bugun polo o’yinidan keyin Vilyam va Keyt Gollivudda mehmon bo’ldi. Shohona ziyofat berildi. Uch kunlik safar davomida yana qator madaniy tadbirlar rejalangan.
Shahzoda Vilyam Amerikaga tez tez kelib turadi, lekin Keyt ilk marotaba tashrib buyurmoqda. Ikki yosh aprel oyida turmush qurgan edi.
Amerikaliklar Vilyamning onasi malika Dianani ardoqlar, uni nafaqat nafosatli va aqlli ayol balki dunyo sahnasida saxiylik va mehr-oqibat elchisi deb bilgan.
Malika Diana 1997 yilning avgustida Parijda avtohalokat oqibatda hayotdan ko’z yumgan.
Shahzoda Vilyam va uning rafiqasi Keyt Britaniya monarxiyasini isloh qilib, uni xalq bilan yaqinlashtiradi deya umidlar bog’langan. Ular yangi avlod vakillari, zamon talablarini tushunadi, deydi qirollik ekspertlari.
