AQSh Davlat kotibi Reks Tillersonning aytishicha, Qatar u bilan diplomatik aloqani uzgan Saudiya Arabistoni, Misr, Bahrayn va Birlashgan Arab Amirliklari talablarini qabul qila olmasa-da, tomonlar muzokara yordamida murosaga kelib, mojaroga barham berishi lozim.
Bu va yana bir necha mamlakat Qatarni terrorizmni qo’llab-quvvatlashda ayblab, ikki hafta oldin munosabatlarni muzlatib qo’ygan edi. Vaziyatni yumshatish uchun rasmiy Doxadan ayrim talablarni bajarish so’ralgan, ammo Qatar bunga ko’nmadi.
Xususan bu davlatdan Al-Jazira televizion tarmog’ini yopish, “Musulmon birodarlar” harakati, Daish, al-Qoida va Livanning Hizbulloh harakati bilan aloqalarni uzish, Eron bilan munosabatlarni susaytirish, muxolif arboblarni topshirish hamda amirlikdagi Turkiya harbiy bazasini yopish so’ralgan. Vositachi rolini Quvayt ijro etdi.
Qatar bu talablar unga to’g’ri kelmasligini, unga qarshi qamal noqonuniy ekanini va terrorga qarshi kurashga aloqasi yo’qligini, Saudiya Arabistoni yetakchiligidagi ayrim mamlakatlar Qatar suverenitetini cheklashga harakat qilayotganini, tashqi siyosatini esa chetdan yuritishmoqchi ekanini aytib, shartlarning barchasini rad etgan.
Tillersonga ko’ra, barcha taraflar vakillari bir stol atrofida o’tirib, muloqot qilishi, hissiyotlarga, do’q-po’pisalarga berilmasligi zarur.
“Qo’shma Shtatlar barcha taraflar bilan aloqa qilgan holda Quvayt amiri orqali kechayotgan vositachilik harakatlarini qo’llab-quvvatlaydi”, - dedi Tillerson.
Facebook Forum