Ovozlar qanday sanaladi?
Bugun yarim tunga borib, barcha ovozlar sanab bo'linishi va kim g'olib chiqqani aniqlanishi kerak. Saylov natijasi har bir shtat va poytaxt Vashingtonda o’tkazilgan saylovlar natijalariga qarab belgilanadi. Har bir shtat g’olibi o’sha shtatdan Kongressda qancha vakil bo’lsa, o’shancha ovoz oladi va bu ovozlar qo’shib hisoblanadi. Birinchi bo’lib 270 ovoz yoki deylik, ochko to’plagan nomzod g’alaba qozonadi.
Quyidagi videoda ovozlar qanday taqsimlanishi haqidagi jarayonni tushuntiramiz.
Saylov uchastkalari gavjum
Mamlakat bo'ylab barcha saylov uchastkalari ovoz berish uchun kelgan fuqarolar bilan to'lgan. Bunaqasi tarixda bo'lmagan, deydi kuzatuvchilar. Ayrim joylarda uzun kutish navbatlari paydo bo'lgan.
Quyida AQShning turli hududlaridagi saylov uchastkalarida olingan suratlarni tomosha qiling (Rasm ustiga bosing).
Amerikaliklar prezident uchun ovoz bermoqda
Nomzodlar ovoz berdi
Mamlakat bo’ylab amerikaliklar ovoz berish uchun saylov uchastkalariga oshiqmoqda. Ko’plab joylarda odamlarning erta tongdan qator bo’lib ovoz berish uchun navbatda turgani kuzatilgan.
Demokratlardan prezidentlik uchun nomzod Hillari Klintonning vitse-prezidentlik uchun hamkori Tim Keyn Virjiniya shtatida ovoz berdi.
“Faqat bizga ovoz berganlar uchun emas, balki hamma uchun ishlashimizni ko’rsatishimiz kerak. Hillari va men bu haqda anchadan beri aytib kelamiz. Agar bugun oqshomda g’alaba qozonsak, ishga shunday yondoshamiz”, - dedi Tim Keyn.
Nyu-York shahrida Hillari Klinton va uning turmush o’rtog’i Bil Klinton ham erta ovoz berganlardan. Demokratlar nomzodi o’z hissiyotini jurnalistlar bilan baham ko’rdi.
“Bu juda mas’uliyatli ish. Ko’plab odamlar shu saylov natijalariga umid bog’lab turibdi. Agar g’olib chiqsam, ularga xizmat qilish uchun bor kuchimni sarflayman”, - dedi Klinton.
Saylov kunigacha o’tkazilgan ommaviy so’rovlarda Hillari Klinton respublikachi raqibi Donald Trampdan oldinda bormoqda.
Respublikachilar vakili Donald Tramp ham Nyu-York shahrida ovoz berdi. U ovoz berib bo'lgach, saylovchilarga bergan qisqa intervyusida, "hammasi ajoyib bo'ladi", dedi.
O’nlab million amerikaliklar turli shtatlarda erta ovoz berish imkoniyatidan foydalanib, 8-noyabrgacha o’z ovozini berib bo’lgan.
Donald Tramp hayotiga nazar
Milliarder tadbirkor Donald Tramp o’nlab raqiblaridan ustun kelib, Respublikachilar partiyasidan prezidentlikka yagona nomzod bo’ldi. Bugungi saylovda u demokratlar nomzodi, sobiq davlat kotibi Hillari Klinton bilan bellashmoqda. Siyosatda tajribasiz bir biznesmenning yirik partiya nomzodiga aylangani AQSh tarixida kutilmagan holat. Quyidagi videoda Donald Trampning hayotiga nazar tashlaymiz.
