Florida Trampga o'tdi. Respublikachilar uchun yana bir katta yutuq. Yirik shtatlardan biri bo'lgan Florida Trampga 29 ta ovoz olib berdi. Tramp Aydaho shtatida ham g'alaba qozondi.
Nyu-Yorkdagi Tramp saylov kampaniyasi ofisida xursandchilik avjiga chiqmoqda.
Kolorado shtati demokratlar qo'liga o'tdi. Klinton ovozlari sonini yana 9 taga oshirdi. Ammo umumiy hisobda hanuz Tramp oldinda bormoqda. Ayni daqiqalarda Klintonda 131, Trampda 198 ovoz bor. Prezident bo'lish uchun kamida 270 ta ovoz yig'ish kerak.
Eslatib o'tamiz, har bir shtatga aholi soniga qarab ma'lum miqdorda elektorat o'rinlari ajratilgan. Shtatdagi ko'pchilik ovozni qo'lga kiritgan nomzod shu shtatga ajratilgan barcha o'rinlarni qo'lga kiritadi.
Ogayo shtatidagi g'alaba Donald Tramp uchun muhim ramziy yutuq bo'ldi. Chunki 1964-yildan beri hech bir nomzod bu shtatni qo'lga kiritmasdan turib AQSh prezidenti bo'la olmagan.
1960-yilda respublikachi Richard Nikson Ogayoda g'alaba qozongan, ammo saylovni demokrat Jon Kennediga boy bergan edi. Ammo o'shandan beri kim Ogayoni yutgan bo'lsa, prezidentlikni ham qo'lga kiritib kelmoqda.
Virjiniyada Klinton g'alaba qozondi. Bu yerda ovozlar teng ketayotgan edi, hatto ma'lum muddat Tramp oldinga chiqib ham olgan edi. Respublikachilar nomzodi esa Ogayo shtatini qo'lga kiritdi.
Michigan, Viskonsin, Florida, Arizona, Shimoliy Karolina, Jorjiya va Nyu-Gempshir shtatlarida ovozlarni sanash davom etmoqda. Ularning barchasida Tramp kichik hisobda oldinda bormoqda.
Ayova va Pensilvaniya shtatlarida ham natijalar hali ma'lum emas, ammo hozircha ularda Klinton ustun.