Nyu-Gempshir shtatidagi uch shaharcha ovoz berib bo'ldi
Amerikaning Nyu-Gempshir shtatidagi uch shaharcha bugungi saylovlarni boshlab berdi.
Meyn shtati va qo’shni Kanada o’rtasida joylashgan Diksvil Notch shahrida saylov uchastkasi yarim tunda ochildi. Qizig’i shundaki, bu shaharchada (qishloq desa ham bo’lar) atigi 8 saylovchi yashaydi. Shulardan to’rt nafari Xillari Klintonga, ikkisi Donald Trampga, biri Libertarianlar partiyasidan nomzod Geri Jonsonga va yana biri Mitt Romniga ovoz bergan.
Mitt Romni oldingi saylovlarda Respublikachilar partiyasidan nomzod bo’lib, Barak Obamaga yutqazgan edi. Amerika qonuniga ko’ra, saylovchi o’ziga yoqqan odamning ismini saylov byulleteniga kiritishi mumkin, garchi bu odam rasmiy nomzod bo’lmasa ham.
Diksvil Notch saylovchilari so’nggi 4 saylovdan uchtasida kim g’olib bo’lishini to’g’ri topgan.
Unga qo’shni Milsfildda esa Donald Tramp g’alaba qozondi. Unga 16 saylovchi ovoz berdi, Klintonga esa 4. Demokratlardan yagona nomzod bo’lish uchun birlamchi saylovlarda Klinton bilan bellashgan Berni Sanders esa bu shaharchada bir kishining ovozini oldi. Sanders tarafdori ham uning ismini byulletenga qo’shib qo’ygan.
Nyu-Gempshirdagi yana bir shahar Xarts Lokeyshnda Klinton 17, Tramp 14, Jonson 3 va Sanders 2 saylovchining ovozini olgan.
Hillari Klintonning tarixiy yutuqlari
Prezidentlik uchun demokratlar nomzodi Hillari Klinton ko'plab tarixiy yutuqlarga erishgan. Ularning eng so'nggisi yirik partiyadan prezidentlik nomzodini qo'lga kiritgan ilk ayol maqomidir. Sobiq birinchi xonim, sobiq senator va davlat kotibi endi "Prezident xonim" unvonini qo'lga kirita oladimi? Buning javobini bugungi saylov yakunida bilamiz. Tarafdorlari va hatto respublikachi raqibi Donald Tramp tomonidan "kurashchi" deya atalgan Klintonning hayot yo'liga nazar tashlaymiz.
Donald Tramp hayotiga nazar
Milliarder tadbirkor Donald Tramp o’nlab raqiblaridan ustun kelib, Respublikachilar partiyasidan prezidentlikka yagona nomzod bo’ldi. Bugungi saylovda u demokratlar nomzodi, sobiq davlat kotibi Hillari Klinton bilan bellashmoqda. Siyosatda tajribasiz bir biznesmenning yirik partiya nomzodiga aylangani AQSh tarixida kutilmagan holat. Quyidagi videoda Donald Trampning hayotiga nazar tashlaymiz.
Nomzodlar ovoz berdi
Mamlakat bo’ylab amerikaliklar ovoz berish uchun saylov uchastkalariga oshiqmoqda. Ko’plab joylarda odamlarning erta tongdan qator bo’lib ovoz berish uchun navbatda turgani kuzatilgan.
Demokratlardan prezidentlik uchun nomzod Hillari Klintonning vitse-prezidentlik uchun hamkori Tim Keyn Virjiniya shtatida ovoz berdi.
“Faqat bizga ovoz berganlar uchun emas, balki hamma uchun ishlashimizni ko’rsatishimiz kerak. Hillari va men bu haqda anchadan beri aytib kelamiz. Agar bugun oqshomda g’alaba qozonsak, ishga shunday yondoshamiz”, - dedi Tim Keyn.
Nyu-York shahrida Hillari Klinton va uning turmush o’rtog’i Bil Klinton ham erta ovoz berganlardan. Demokratlar nomzodi o’z hissiyotini jurnalistlar bilan baham ko’rdi.
“Bu juda mas’uliyatli ish. Ko’plab odamlar shu saylov natijalariga umid bog’lab turibdi. Agar g’olib chiqsam, ularga xizmat qilish uchun bor kuchimni sarflayman”, - dedi Klinton.
Saylov kunigacha o’tkazilgan ommaviy so’rovlarda Hillari Klinton respublikachi raqibi Donald Trampdan oldinda bormoqda.
Respublikachilar vakili Donald Tramp ham Nyu-York shahrida ovoz berdi. U ovoz berib bo'lgach, saylovchilarga bergan qisqa intervyusida, "hammasi ajoyib bo'ladi", dedi.
O’nlab million amerikaliklar turli shtatlarda erta ovoz berish imkoniyatidan foydalanib, 8-noyabrgacha o’z ovozini berib bo’lgan.