19:00 da (10 daqiqadan so'ng) Indiana, Kentuki, Jorjiya, Janubiy Karolina, Vermont va Virjiniya shtatlarida ovoz berish nihoyasiga yetadi. Bular saylov yakunlanayotgan dastlabki shtatlar. Saylov uchastkalari yopilishi bilan ovozlarni sanash va natijalar haqida xabar berish boshlanadi.
Saytimizdagi saylov xaritasini kuzatib boring. Natijalar e'lon qilinishi bilan uni yangilab boramiz.
Shtatlar natijalarni e'lon qila boshladi
Indiana, Kentuki, Jorjiya, Janubiy Karolina, Vermont va Virjiniya shtatlarida ovoz berish yakuniga yetdi. Dastlabki natijalarga ko'ra, Kentuki va Indianada Donald Tramp g'alaba qozondi. Klinton esa Vermont shtatini qo'lga kiritdi. Virjiniya, Jorjiya va Janubiy Karolinada g'olib hozircha aniq emas.
Shimoliy Karolina, Ogayo va G'arbiy Virjiniya shtatlarida ovoz berish nihoyasiga yetdi. Dastlabki natijalarga ko'ra, G'arbiy Virjiniyada Donald Tramp ustun kelgan. Qolgan ikki shtatda g'olibni aniqlash uchun hali erta. Ovozlarni sanash davom etmoqda.
Hozircha respublikachilar nomzodidagi elektorat ovozlari soni 24 taga yetdi. Hillari Klintonda esa 3 ta. Kamida 270 ta ovoz yig'gan nomzod prezident etib saylanadi.
Navbatdagi 16 shtatda ovoz berish nihoyasiga yetdi
AQShda saylov kuni nihoyasiga yetib borar ekan, shtatlar birin-ketin natijalarni e'lon qilmoqda. 20:00 da 16 shtatda ovoz berish yakunlandi. Ushbu shtatlarda ayni daqiqalarda ma'lum bo'lgan natijalarga ko'ra, elektorat ovozlari soni bo'yicha Klinton Trampdan oldinga chiqib oldi.
Tramp Janubiy Karolina, Alabama, Tennesi va Oklaxomada g'olib bo'ldi. Klinton esa Vashington Kolumbiya okrugi, Merilend, Nyu-Jersi, Massachusets, Illinoys, Roud Aylend, Konnektikut va Deloverda ustun keldi. Qolgan shtatlarda ovozlarni sanash davom etmoqda.